Erion Veliaj zgjodhi linjën Qendër-Kombinat për të shkuar në njësinë 7 për të prezantuar administroren e re, Gjinovefa Kadria.
Vend të lirë në autobusin pa kondicioner nuk gjeti gjatë inspektimit të shkurtër që i bëri linjës, ndërkohë që kërkoi nga administratorët e rinj standardet më të larta në shërbimin ndaj qytetarëve.
“Minimalisht ju detyrohemi t’i dëgjojmë me respekt dhe nëse nuk problemin nuk e zgjidhim dot ne, t’i drejtojmë në vendin ku zgjidhet. Por telefonat mbyllur, njerëz që nuk kthejnë përgjigjie, unë nuk do të toleroj”, tha Veliaj.
Nga njësia 7 prej nga nisi turin e prezantimit të administratorëve, Erion eVliaj ka pritshmëri të larta, veçanërisht tani që e konsideron qytetin në emergjencë. Kryefjala për muajin gusht është pastrimi i qytetit.
“Secili prej jush të dalë për të inspektuar që kompanitë e pastrimit pas ultimatumit që morën dje pastrojnë qytetin sipas kontratës që kanë nënshkruar, për të siguruar që i gjithë territori është nën kontroll të pastrimit dhe për t’i siguruar që në një periudhë, ndoshta në shtator, ne të ftojmë të gjithë komunitetin e Tiranës në një aksion të jashtëzakonshëm pastrimi, përfshirë këtu edhe qytetarët”, shtoi Veliaj.
Muaji gusht nuk do të jetë kohë pushimi për ata që punojmë për bashkinë. Në axhendën e kryebashkiakut emergjencat për zgjdhje janë disa.
“Operacioni për lirimin e trotuareve, operacioni për lirimin e shesheve ku duhet të luajnë fëmijët dhe jo subjektet tregtare dhe lirimin e vendeve të parkimit. E gjithë historia e zënies me mjete rrethanore, me copa betoni, kangjella, vazo, të gjitha këto do të largohen. Të jeni në gatishmëri të plotë për këto 3 operacione”, kërkoi Veliaj.
