Të mërkurën i është dhënë lamtumira e fundit Blermi Behramit, nxënësit të klasës së VI/3 të Shkollës Fillore ‘Musa Hoti” në Mitrovicë, pasi një ditë më parë ka humbur jetën aksidentalisht në një gropë me ujë në brigje e lumit ‘Sitnica’.
Për vdekjen tragjike të Behramit, policia e Kosovës është duke bërë hetimet, ndërsa zyrtarë Komunalë të Mitrovicës as që e kanë idenë se cila kompani ka bërë hapjen e asaj grope që ka shfrytëzuar rërën.
Në varrezat e qytetit të Mitrovicës në prezencë të nxënësve të klasë, shokëve të Klubit Futbollistik si dhe shumë qytetarëve, por pa prezencën e zyrtarë të Komunës së Mitrovicës e me dhembje të madhe, është varrosur nxënësi Blerim Behrami.
Behrami 12-vjeçar nga fshati Kaçandoll i Mitrovicës, por që me familjen e tij jetonte në fshatin Frashër, është mbytur në lumin Sitnica, të martën rreth orës 16:00.
Familjarët e fëmijës 12 vjeçar pas kryerjes së ceremonie së varrimit kanë deklaruar se “Blerimi ka qenë një fëmijë shumë i mirë, i sjellshëm, futbollist i mirë si dhe nxënës shembullor”.
“Vdekja e tij na ka tronditur, jo vetëm familjen por të gjithë qytetarët e Mitrovicës e më gjerë. Shpresoj që të jetë e vdekja e fundit që fëmijët tanë të humbin jetën në mënyrë tragjike” ka thënë Ismeti, babai i Blerimit.
“Institucionet Komunale dhe ato qendrore duhet të reagojë që të mos lejojë hapjen e këtyre gropave edhe nëse hapen atëherë pas shfrytëzimit ato duhet të mbyllen”- ka shtuar Ismeti.
Zëdhënësi i policisë së Kosovës për rajonin e Mitrovicës, Avni Zahiti, i ka thënë portalit ‘Tesheshi’ se “policia e Kosovës është duke kryer hetimet për përgjegjësin e mbytjes së të riut nga fshati Frashër. Ende nuk kemi ndonjë të dyshuar konkret, por këtu dyshohet edhe për përgjegjësi institucionale pasi që punë nuk janë kryer dhe përfunduar konform ligjeve në fuqi”,- ka thënë Zahiti.
Sipas ligjeve në fuqi në Kosovë është e ndaluar nxjerrja dhe shfrytëzimi i rërën së lumenjve edhe në brigjet e tyre.
Institucionet Komunale të Mitrovicë të mërkurën nuk kanë mundur ti japë përgjigjeje portalit ‘Tesheshi’ se cila Kompani ka bërë nxjerrjen e rërës duke lënë atë gropë të thellë rreth 8 m, me gjeri mbi 20 m e gjatësi mbi 50 m.
“Nuk kemi informacione së paku Drejtoria e ime, se cila Kompani ka shfrytëzuar rërën duke lënë atë hapësirë në atë gjendje e për fat të keq tani humbi jetën edhe një fëmijë”,- ka thënë Drejtori i Drejtorisë për Mbrojtje të Mjedisit dhe Pyjeve në Komunën e Mitrovicës, Enver Uka.
Sipas tij “Komuna nuk lëshon dhe nuk jep pëlqime për shfrytëzim të rërës e aq më pak në toka bujqësore si është hapur ajo gropë”.
Ai ka shtuar se licencat për këto çështje duhet të jepen nga Komisioni i Pavarur për Miniera dhe Minerale, ndërsa që Komuna përkatësisht drejtoria e Ambientit lëshon vetëm pëlqimin. Sa i takon për rastit konkret, Uka ka thënë se nuk është kërkuar asnjë lloj pëlqimi.
Ai ka deklaruar se pas këtij rasti do ti shkruajnë Ministrisë së Ambientit, që jo vetëm këtë gropë por edhe gropat tjera që janë hapur nga kompani të ndryshme për shfrytëzim të rërës në brigjet e lumit Sitnica, të mbyllen.
Nasuf Aliu, Drejtor i Drejtorisë së Bujqësisë ka theksuar se kjo drejtori do të marrë të gjitha masat e nevojshme që të ndalojë degradimin e tokës bujqësore.
“Shfrytëzimi i rërës së lumenjve e sidomos prishja e tokës bujqësore për shfrytëzim të rërës, është e ndaluar me ligj dhe për këtë do të marrim masa”,- ka thënë Aliu.
Zyrtarët komunalë të Mitrovicës kanë premtuar se do të reagojnë për mbylljen e këtyre gropave dhe nuk do të lejojnë degradimin e tokës bujqësore vetëm pas interesimit të portalit ‘Tesheshi’.
E mërkura për nxënësit e klasë së VI/3 të Shkollës Fillore “Musa Hoti’, ka qenë ditë zie. Ata kanë humbur nënkryetarin e klasës dhe nxënësin më të mirë të saj, Blerim Behramin.
Të shqetësuar për këtë vdekje tragjike të shokut të tyre, nxënësit kishin mbajtur vetëm dy orë mësimi, ndërsa që në bankën ku ai ishte ulur kishin vendosur dy flamuj atë Kombëtar dhe të Kosovës si dhe buqeta me lule në shenjë nderimi.
Izet Tahiri, kujdestar i Klasës së VI/3, ka theksuar se ka qenë e pa munduar që sot të mbahet mësim me nxënësit, pasi ishin shumë të shqetësuar për humbjen tragjike të shokut të tyre. “Blerimin e kam pas nxënës shembullor të klasës, pastaj nënkryetar klase si dhe ka qenë një aktivist dhe sportist i dalluar. Blerimi, ka qenë shumë i urtë, i sjellshëm, i dashur dhe i dalluar ndër shokët e tij, ai gjithmonë I ka këshilluar dhe ndihmuar nxënësit e tjerë” ka thënë Tahiri.
Në anën tjetër Drejtori i Shkollës, Iset Beka të gjithë nxënësve të shkollës në fillim të mësimit të paradites iu kishte folur për jetë e veprën e Blerm Behramit.
“Blerimin ka qenë një talenti i madh. Ka qenë portieri më i mirë në ligën rajonal të futbollit në Mitrovicë për grupmoshat U 13”,- ka thënë pronari dhe Drejtori i Klubit futbollisti ‘Australia’, Jeton Ujkani.
“Vdekja e tij tragjike na ka shokuar. Klubi ynë ka humbur një nga talentet më të mëdhenj e që vështirë se do të kompensohet kjo humbje”,- ka shtuar Ujkani.
Ndërkohë, qytetarët mitrovicas kërkojë përgjegjësi institucionale për vdekjen tragjike të nxënësit të klasës së VI/3.
“Kjo nuk është vdekje tragjike. Kjo është vrasje institucionale dhe tek institucionet duke të kërkohet përgjegjësi”,- ka thënë Burim Beqiri, njëri nga pjesëmarrësit në ceremoninë e varrimit.
“Institucionet kanë dhënë leje për hapjen e asaj grope, por kanë neglizhuar që të kujdesen që Kompania që e ka hapur edhe ta mbyll, e për këtë shkak dikush pra ai që është përgjegjës për këtë duhet të dalë para drejtësisë”,- ka thënë Beqiri. /tesheshi.com/
