Nga Mensur Krasniqi
Rikthehet Kuvendi në Maqedoni. Pas vlerësimit të kushtetueshmërisë për shpërbërjen e Kuvendit nga ana e Gjykatës Kushtetuese me propozim të deputetit të BDI-së, Talat Xhaferi, edhe pse ky i fundit vet kishte ngritur dorën “pro” para disa muajsh, kryetari i Kuvendit, Trajko Veljanovski dje ka thirrur seancë të re. Në këtë seancë, me 69 vota “pro”, VMRO dhe BDI votuan për rikthimin e ministrave të VMRO-së në Ministrinë e Punëve të Brendshme dhe Ministrisë për Punë dhe Politikë Sociale, Mitko Çavkov, gjegjësisht Dime Spasov.
Ndryshe, këto ministri deri dje, sipas Marrëveshjes së Përzhinos (marrëveshje kjo për dalje nga kriza politike e nënshkruar ndërmjet katër liderëve partiakë dhe me ndërmjetësimin e komunitetit ndërkombëtar) i takonin partisë më të madhe në opozitën maqedonase, LSDM-së.
Rikthimi i VMRO-BDI-së në Kuvend, për Lëvizjen BESA paraqet atentatin e rradhës ndaj Marrëveshjes së Përzhinos. Madje sipas tyre, me këtë u vërtetua se BDI përbën një tufë votash në duar të VMRO-DPMNE-së.
“Ashtu siç kemi thënë edhe më parë, sot – pasi që u mblodh përsëri Kuvendi i Republikës së Maqedonisë – BDI-ja vazhdoi me shërbimet e saj për VMRO-në. Kësaj radhe ajo i bashkoi duart me deputetët e VMRO-së për ta suprimuar dhe vrarë Marrëveshjen e Përzhinës dhe për ta anuluar përpjekjen e gjithë bashkësisë ndërkombëtare në krye me SHBA-të dhe BE-në për arritjen dhe realizimin e saj. Me votimin e ministrave të VMRO-së, të Punëve të Brendshme dhe të Punës e Politikës Sociale, iu bë edhe një atentat Marrëveshjes dhe kështu edhe një herë u dëshmua në vepër se në cilën anë është subjekti shqiptar në pushtet – thjesht një tufë votash në duar të VMRO-DPMNE-së.
Me këtë rast, Lëvizja BESA edhe një herë kërkon që detyrimisht të zbatohen detyrimet e Marrëveshjes së Përzhinës, ngase ndryshe le që nuk mund të flasim për zgjidhje të krizës, por në këtë mënyrë vendi futet në krizë edhe më të thellë, pasojat e së cilës nuk do të mund të parashikohen.”, thonë nga Lëvizja Besa.
Ndërsa për ish-deputetin e BDI-së, gjegjësisht nënkryetarin e partisë së re “UNITETI”, Zylfi Adili, rikthimi i deputetëve në Kuvend nuk është se i shërben daljes nga kriza politike në vend, por sipas tij kështu vetëm se thellohet kriza politike edhe më shumë. Ai, subjektin politik shqiptar në pushtet, BDI-në e quan vasal të VMRO-së.
“Qëllimi dhe ideja e BDI-së që ngriti iniciativën në Gjykatën Kushtetuese për ta rikthyer parlamentin paska qenë vetëm se për t’i votuar dhe rikthyer ministrat e mëparshëm të VMRO-së. Dihet se po e njëjta BDI ishte iniciatore për shpërbërjen e parlamenti veç ma dy herë, dhe tani për çfarë sinqeriteti dhe iniciative për të dal nga kriza flet BDI. Kjo veç se e vazhdon dhe e thellon krizën në vend, shpresa e vetme janë faktori ndërkombëtar dhe populli i cili proteston bashkë me opozitën. Vazaliteti i BDI-së vazhdon”, ka shkruar në profilin e tij zyrtar në facebook, Zylfi Adili.
Në mungesë të vizionit dhe në mungesë të kapaciteteve politike në vend, sipas politikologut Xhenis Sulimani, partitë politike dijnë shpesh me plotë vetëdije të krijojnë kriza, për të cilat pastaj tentojnë të dalin si heronj duke marrë bajrakun për zgjidhjen e krizës. Ai në një prononcim për portalin tesheshi.com pyeti përfaqësuesit e partisë shqiptare në pushtet, BDI-në, se ku ishin këta “ekspert juridik” të BDI-së në momentin kur deputetët votuan “pro” shpërbërjes?
“Shpërbërja e Parlamentit që në fillim ishte kontestuese, por atëherë BDI e votoi të njëjtin, ndërkaq sot rrah gjoks se e shpëtoi vendin nga kriza pas iniciativës që e ngriti në kushtetuese për verifikim të kushtetutshmërisë të shpërbërjes së parlamentit. Shtrohet pyetja ku ishin këta “ekspert juridik” të BDI-së në momentin kur deputetët votuan pro shpërbërjes? Kështu që kjo nuk mund të interpretohet ndryshe pos një lojë e tandemit tanimë të famshëm VMRO-BDI për të dalë si fitues i dështimit. Kjo mendoj se është një leksion i mirë për qytetarët që të mund të vlerësojnë nesër se a duhet apo jo të votohen fituesit e dështimeve”, deklaroi Xhenis Sulimani. /tesheshi.com/
