Një valë procedimesh penale e urdhër-ndalimesh janë lëshuar nga Prokuroria e Tiranës në adresë të një numri personash të dyshuar për krijimin e skemave mashtruese me qëllim kreditimin e TVSH-së.
Është fjala për 25 urdhër-ndalime, për 25 personat që figurojnë si administratorë të subjekteve të dyshuara fiktive që vepronin në Tiranë, Durrës dhe Elbasan, e që kanë lëshuar fatura të falsifikuara për subjekte të treta, duke i shkaktuar buxhetit të shtetit një dëm prej 18 miliardë lekësh.
Deri më tani janë ekzekutuar 13 urdhër-ndalime, ndërsa 12 persona të tjerë janë shpallur në kërkim.
Ndaj këtij zhvillimi ka reaguar kryeministri Rama, duke përcjellë këtë mesazh:
“Ulja e taksave e lehtësimi tërësor i biznesit, synojnë dhe uljen e informalitetit dhe evazionit fiskal! Arrestimi i një duzine shkelësish dhe shpallja në kërkim e një tufe tjetër nga biznesi i madh, për mashtrim me taksat, është mesazh i qartë: Mos luani me taksat se ju gjen belaja!”.
