Vala e të nxehtit të pamëshirshëm, e quajtur “Luçifer”, e cila këtë javë përfshiu disa pjesë të Evropës dhe gjithë Ballkanin, ka shkaktuar vdekjen e të paktën dy personave.
Përcëllimi nga moti ka detyruar autoritetet që të lëshojnë paralajmërime shëndetësore.
Vapa ekstreme në Itali dhe në pjesë të Francës, Spanjës dhe në Ballkan, shkak ër shpërthimin e dhjetra zjarreve, ka shkatërruar të mbjellat dhe ka rritur konsumimin e ujit dhe të energjisë elektrike. Autoritetet në disa zona kanë kufizuar trafikun dhe kanë ndaluar punën përjashta në pjesën më të nxehtë të ditës, për shkak të temperaturave që kanë kaluar 40 gradë, njofton Associated Press.
Në Rumani, dy persona kanë vdekur nga të nxehtit. Dje një 45-vjeçar ka vdekur duke punuar në fushë, ndërkaq të enjten një 60-vjeçar ka vdekur në rrugë nga një sulm në zemër. Policia rumune ka kufizuar trafikun në rrugët kryesore gjatë ditëve gjatë fundjavës, sipas AP.
Meteorologët në Kroaci kanë njoftuar se vala e të nxehtit në disa pjesë të vendit do të thejë rekordet e mëparshme, ngase temperaturat po tejkalojnë 40 gradë. Në këtë vend, temperaturat e larta dhe sezoni turistik kanë trefishuar numrin e ndërhyrjeve të emergjencës, veçanërisht në Adriatik.
Nga ana tjetër, instituti malazez i Shëndetit Publik këshilloi opinionin se për shkak të valës së të nxehtit deri me 10 gusht të qëndrojnë në hije dhe t’i shmangen ekspozimit të drejtpërdrejtë në rrezet e diellit, si dhe daljes jashtë në zheg të ditës.
Në Slloveni këtë javë është regjistruar “nata e parë tropikale” në 1500 metra mbi nivelin e detit, që do të thotë se temperatura ka tejkaluar 20 gradë gjatë natës.
Shërbimi Hidrometeorologjik i Serbisë sot ka lëshuar paralajmërimin për temperatura deri në 42 gradë në territorin e vendit, të cilat pritet të zgjasin deri me 10 gusht.
Shërbimi hidrometeorolgjik i Spanjës ka lëshuar një paralajmërim në 31 deri 50 krahina, pasi temperaturat pritet të arrijnë deri në 44 gradë.
Temperaturat e larta në Itali kanë shkaktuar zjarre, kurse Ministria e Shëndetësisë për shkak të valës së të nxehtit ka lëshuar një “alarm të kuq” për disa dhjetra qytete. Italia është përballur me temperatura 10 gradë më të larta se mesatarja për këtë kohë të vitit. /tesheshi.com/
