Bashkimi Evropian po eksploron mënyra për të mbështetur vendet fqinje në përpjekjet e tyre për të marrë vaksinat e koronavirusit, tha zëdhënësja e Politikës së Fqinjësisë së Komisionit Evropian, Ana Pisonero Hernandez.
Komisioni Evropian të mërkurën mori një letër nga 13 shtete anëtare të BE që bën thirrje për qasje më të lehtë në vaksinat për një grup më të madh të vendeve fqinje.
Nënshkruesit – Bullgaria, Kroacia, Republika Çeke, Danimarka, Estonia, Finlanda, Hungaria, Letonia, Lituania, Polonia, Rumania, Sllovakia dhe Suedia – mirëpresin përpjekjet e vazhdueshme të BE për të lehtësuar aksesin në vaksinat për Ballkanin Perëndimor.
Sigurimi i mbështetjes edhe për vendet e tjera
“Në të njëjtën kohë, ne besojmë se BE duhet të shkojë përtej iniciativave aktuale dhe të sigurojë vëmendje dhe mbështetje të ngjashme për fqinjët e tjerë të Unionit – vendet e Partneritetit Lindor – nëse ata dëshirojnë,” tha letra.
Partneriteti Lindor është një iniciativë e përbashkët që synon forcimin e lidhjeve midis vendeve anëtare të BE dhe gjashtë fqinjëve të tyre lindorë: Armenia, Azerbajxhani, Bjellorusia, Gjeorgjia, Moldavia dhe Ukraina.
“Ne jemi duke eksploruar se si mund të ndihmojmë Ballkanin tonë Perëndimor dhe fqinjësinë tonë të drejtpërdrejtë në lindje, jug dhe madje edhe më gjerë,” tha Pisonero Hernandez.
Ajo shpjegoi se, përveç vendeve dhe institucioneve të BE-së, organizata të tjera financiare ndërkombëtare mund të përfshihen në program.
Bashkimi Evropian, me një popullsi prej rreth 450 milion, ka nënshkruar marrëveshje me gjashtë prodhues të vaksinave për të blerë gati dy miliardë doza vaksinash. /tesheshi.com/
