Salla e Kuvendit ka pasur sot në vendet e deputetëve njerëz të thjeshtë, nga zonat rurale të vendit, të cilët kanë shprehur hallet dhe problemet e përditshme.
Por ajo që ka emocionuar, madje ka përlotur të pranishmit, përfshirë edhe përfaqësues të komunitetit ndërkombëtar, ishte e vajzës mirditore Rigerta Loku, fjalimi i së cilës është ndërprerë disa herë nga duartrokitjet.
Ajo ka treguar me lotësh vuajtjen e gjithë grave e vajzave që si ajo jetojnë përditë mes tokës, bagëtive dhe halleve.
Vajza nga Rubiku u kthye nga Italia gjashtë vjet më parë, pasi studioi Shkenca Politike në Universitetin prestigjoz të “La Sapienza-s” në Romë dhe u specializua për marrëdhënie ndërkombëtare; u kthye në qytetin e lindjes dhe hapi një fermë dhish.
“Duhet të vini te stallat atje, jo unë të vij këtu në Kuvend. Unë jam aty, nuk shkoj asgjëkundi pres, nuk qëndroj kot, punoj, por pres. Ejani të shikoni, ejani atje, në doni ushqim bukë e zemër, ushqime bio, ejani në fshat, ju lutem gjithsecilit të mos vini me makinë të vogël, ejani me fuoristradë, se atje nuk shkon makina, nuk shkon makina. Fshatrat e strukur nuk kanë rrugë, jepini ujë dhe rrugë fshatit dhe zhvillim, nuk kërkojmë asgjë tjetër”, tha ajo. /tesheshi.com/
