Ishujt Turks dhe Caicos janë goditur nga Irma, ndërkohë që uragani vazhdon të bëjë shkatërrime në Karaibe, duke rritur bilancin e përgjithshëm të viktimave në 13.
Qendra nacionale amerikane për uragane (NHC) paralajmëroi, se Irma do të qëndrojë në kategorinë e katërt ose të pestë edhe gjatë një ose dy ditëve të ardhshme.
Irma pritet të godasë Kubën të premten mbrëma, ndërkohë që është duke lëvizur drejt Bahama.
Britania ka dërguar qindra trupa dhe marinën mbretërore në territoret e saj tej oqeanike.
Qeveria britanike ka ndarë 32 milionë paund për të përballuar dëmet e shkaktuara si pasojë e uraganit Irma, transmetojnë mediat britanike.
Aeroporti ndërkombëtar në Nasau do të mbyllet për shkak të uraganit Irma.
Për shkak të tij, do të mbyllen edhe aeroportet më të vogla në ishujt fqinj, njoftoi sot qeveria e shtetit Bahama.
Qeveria ka paralajmëruar qytetarët që sa më shpejt të braktisin ishujt në lindje të Floridës.
Ndërkohë, edhe guvernatori i Xhorxhisë, Nathan Deal urdhëroi evakuimin e bregut atlantik të shtetit federal amerikan, për shkak të uraganit të fuqishëm Irma, i cili pritet të godasë këtë pjesë të shtunën.
Deal sot urdhëroi evakuim urgjent të banorëve të rajoneve në lindje të autostradës Interstate 95, si dhe për disa rajone në perëndim të kësaj autostrade. Paralajmërimi përfshin 30 qarqe. /tesheshi.com/
