Nga Saimir Sulaj, Uashington
Pjesa jugore e shtetit amerikan të Teksasit nuk po sheh ditët më të mira. Uragani “Harvey” ka sjellë dëme të mëdha.
Por në atë zonë të Teksasit jetojnë edhe shumë shqiptarë që janë prekur nga moti ekstrem. Për fatin e mirë, në mesin e komunitetit të vogël shqiptar nuk ka pasur asnjë fatalitet përpos dëmeve të shumta materiale.
Ambasadorja e Shqipërisë në Uashington, zonja Floreta Luli-Faber, përmes një njoftimi zyrtar në faqen e saj në Facebook, jep një pasqyrë të saktë të efekteve që uragani ka pasur mbi familjet shqiptare.
“Komuniteti shqiptar atje, megjithëse relativisht i vogël në numër, përbëhet nga 500-600 familje.
E prekur thellësisht për sa kam ndjekur përditësimin e ngjarjeve, ju drejtohem të gjithëve bashkëkombasve të mi, ju që po vuani pasojat e natyrës bashkë me të gjithë pjesën tjetër të popullsisë amerikane që jeton dhe punon në Hjuston dhe rrethinat e tij.
Nga kontaktet me autoritetet kemi mësuar se deri tani nuk ka patur fatalitete ndërmjet familjeve shqiptare. Kam kontaktuar me drejtuesit e organizatës Arberia Houston dhe jam informuar se janë të paktën 20 familje shqiptare të prekura totalisht nga kjo fatkeqësi natyrore duke iu rrëmbyer shtëpitë, makinat, dhe të gjithë pasurinë që ato kanë.”, – njofton ambasadorja shqiptare në SHBA.
Zonja Luli-Faber vë në dispozicion edhe kontaktet e ambasadës në Uashington për çdo emergjencë apo nëse dikush ka nevojë për t’u lidhur me familjarët.
“Kontaktet e Ambasadës në Uashington 202.223.4942, [email protected]mfa.gov.al dhe numri i emergjencës 202.758.9526 janë të hapura për çdo informacion apo për t’u lidhur me familjarët tuaj. Do ju vëmë në dispozicion të gjitha sa ne kemi mundësi.”, – përfundon zonja ambasadore. /tesheshi.com/
