Një gjykatë ukrainase dënoi të hënën me burgim të përjetshëm ushtarin rus Vadim Shishimarin për vrasjen e një civili të paarmatosur gjatë gjyqit të parë për krime lufte që nga fillimi i pushtimit rus.
Shishmarin, 21 vjeç, ndryshe komandanti i ekuipazhit të tankeve, u deklarua fajtor më herët për vrasjen e një 62-vjeçari më 28 shkurt në fshatin Chupahivka, në verilindje të Ukrainës.
Ai tha se ishte urdhëruar që të qëllonte nga makina në drejtim të burrit, raporton Reuters.
Gjykatësi Serhiy Agafonov tha se Shishimarin e qëlloi civilin disa herë në kokë me një armë automatike.
Shishimarin ndoqi shpalljen e vendimit në heshtje, në një hapësirë të ndarë me xham dhe nuk shfaqi asnjë emocion.
Ushtari rus synon të paraqesë një apel, tha sot avokati i tij Viktor Ovsyanikov.
“Ky është dënimi më i rëndë dhe çdo njeri normal do ta sfidonte. Do të kërkoj anulimin e vendimit”, tha Ovsjanikov, raporton BBC.
Shishimarin u gjykua sipas pjesës së ligjit penal që i referohet rregullave të luftës.
Kryeprokurorja e Ukrainës, Irina Venediktora, tha më herët se zyra e saj po përgatitte çështje kundër 41 ushtarëve rusë të dyshuar për shënjestrimin e objektivave civile, vrasjen e civilëve, përdhunimin dhe plaçkitjen.
Aktualisht nuk dihet se sa të dyshuar ka kapur Ukraina dhe sa do të gjykohen në mungesë.
Gjyqi ka një rëndësi të madhe simbolike për Ukrainën, e cila akuzon Rusinë për mizori dhe brutalitet kundër civilëve gjatë pushtimit.
Zyrtarët ukrainas thonë se kanë identifikuar më shumë se 10,000 krime të mundshme lufte.
Zëdhënësi i Kremlinit Dmitry Peskov tha se Rusia ishte e shqetësuar për fatin e Shishimarin.
“Për fat të keq, ne nuk kemi mundësi të mbrojmë interesat e tij atje, sepse veprimi i institucioneve tona në Ukrainë është praktikisht i pamundur”, shpjegoi Peskov, duke shtuar se Rusia do të konsideronte “përdorimin e kanaleve të tjera”, raporton BBC. /tesheshi.com/
