Pas avionit industria turke e armatimit ka nxjerrë nga prodhimi edhe një anije luftarake zbarkuese që rrëshqet edhe në cektinë (amfibe).
Anija “TCG Bayraktar”, është inaguruar sot duke u lëshuar në det të hapur. Anija ushtarake u ndërtua në kantierin e Tuzlas pranë Stambollit, ku u zhvillua një ceremoni shtetërore.
Presidenti turk, Rexhep Taip Erdogan, deklaroi se varësia e jashtme e Turqisë në industrinë e mbrojtjes po reduktohet çdo ditë e më shumë.
Erdogan shtoi se përshkallëzimi i akteve terroriste në vend shpalos qartë sesa të drejtë ka qeveria në lidhje me rritjen e investimeve në industrinë e mbrojtjes.
“Do të vazhdojmë ta fuqizojmë ushtrinë tonë me të gjitha elementët e saj për të bërë të palëkundur paqen, qetësinë dhe sigurinë në vend, rajon dhe në botë. Kjo nuk duhet të shqetësojë askënd. Nëse duam paqe, atëherë duhet të jemi gjithnjë gati për luftë. Diplomacia të lë në mes të katër rrugëve nëse nuk gëzon mbështetjen e forcës ushtarake”, është shprehur Presidenti i Turqisë.
“TCG Bayraktar” është një nga anijet zbarkuese më të mëdha në botë, që është ndërtuar në Kantierin e Tuzlas për Forcat Detare të Turqisë, ku të gjitha linjat e prodhimit janë vendase. Industria turke ka dhënë 70 për qind kontribut në ndërtimin e kësaj anijeje, ndërsa pjesa tjetër është teknologji e huaj, e huazuar ose e blerë.
Siç njofton televizioni public turk, TRT, nëse do të jetë e nevojshme, anija “TCG Bayraktar”, e cila do të marrë pjesë edhe në misione ndërkombëtare, mund të shfrytëzohet gjithashtu për operacione shpëtimi në fatkeqësi natyrore.
E pajisur me një sistem, që i siguron mbrojtje të plotë kundër sulmeve bërthamore, biologjike dhe kimike, “TCG Bayraktar” është një anije e aftë të prodhojë edhe energji elektrike.
/tesheshi.com/
