Ministria e Jashtme turke ka vendosur të “përfundojë misionin e ambasadorëve dhe diplomatëve” të ambasadës afgane në Ankara, njoftoi ambasada në platformën X, raporton AFP.
Ambasada afgane në Turqi dhe dy konsullatat, në Ankara dhe Stamboll, i kanë shpëtuar kontrollit të talebanëve që nga ardhja e tyre në pushtet në vitin 2021, duke vazhduar të operojnë me staf të përzgjedhur nga qeveria e mëparshme afgane.
Në një mesazh në platformën X, ambasada thekson se ka pasur “përpjekje të pasuksesshme nga talebanët për të marrë kontrollin e ambasadës dhe presion të vazhdueshëm ndaj diplomatëve dhe punonjësve të ambasadës, si dhe presion (nga Afganistani) ndaj Qeverisë së Turqisë”.
Në përputhje me Konventën e Vjenës
Ambasada shpjegoi se vendimi i Turqisë, si vend pritës, për ta mbyllur atë ishte në përputhje me Konventën e Vjenës për Marrëdhëniet Diplomatike.
Agjencia AFP raporton se Ambasada ishte e hapur të enjten, por stafi pret që ajo të mbyllet nga sonte. /tesheshi.com/
