Një çift britanik po mbahet në Iran me akuzën për spiunazh, sipas agjencisë iraniane të lajmeve.
Të arrestuarit, Craig dhe Lindsay Forman, dyshohet se bashkëpunonin me “institucione sekrete të lidhura me shërbimet e inteligjencës të vendeve armiqësore dhe perëndimore”.
Agjencia shtetërore iraniane e lajmeve Mizan raportoi se çifti u arrestua në qytetin juglindor të Kermanit, i akuzuar për aktivitete që rrezikonin sigurinë kombëtare.
Sipas autoriteteve iraniane, dy britanikët “hynë në vend si turistë, por në realitet ata po kryenin aktivitete hetimore për të mbledhur informacion”.
Çifti ishte në një udhëtim me motor në vende të ndryshme, si pjesë e një misioni për promovimin e psikologjisë pozitive, me destinacion përfundimtar në Australi. Në rrjetet sociale, Lindsay Forman kishte postuar për itinerarin e tyre, duke përmendur në dhjetor se ata do të kalonin përmes Iranit dhe Pakistanit, dy nga pjesët më “të vështira” të udhëtimit të tyre.
Media shtetërore iraniane publikoi një foto që dyshohet se tregon çiftin duke takuar ambasadorin britanik në Iran, Hugo Shorter. Në foto, dy persona janë ulur përballë diplomatit, por fytyrat e tyre janë të paqarta.
Ministria e Jashtme Britanike ka lëshuar një paralajmërim për qytetarët e saj që të shmangin udhëtimin në Iran, për shkak të rrezikut të “arrestimit, ndalimit dhe dënimit me vdekje”.
Një zëdhënës i Zyrës së Jashtme tha se Britania po ofronte mbështetje për çiftin dhe ishte në kontakt me autoritetet iraniane. Megjithatë, fati i dy të arrestuarve mbetet i paqartë, pasi Teherani ka ashpërsuar qëndrimin ndaj shtetasve të huaj që hyjnë në vend në rrethana të dyshimta. /tesheshi.com/
