Tërheqës sa më s’ka, Stambolli është i këndshëm kurdo që ta vizitosh, në çdo stinë. Historia, ndërthurja e të djeshmes me të sotmen, gjithçka që ka ndodhur e që ngjet në të, të grish gjithmonë për një vizitë.
Aq më tepër tani, me ardhjen e pranverës… Një kahvaltı, apo, shqip, mëngjes, mund ta shijosh në tarracën e një hoteli të vogël, por shumë mikpritës, pranë Sulltanahmetit…
Ndryshe, një gotë çaj në dorë, pak më tutje në kohë, gjatë paradites, buzë detit, në Beshiktash, Ortakoj, Arnavutkoj, Bebek, është një përjetim i patregueshëm, i papërjetueshëm askund tjetër…
Lundrimi brigjeve të pjesës europiane apo aziatike, apo për në ishujt afër, të jep një prehje të paprovuar…
Po një shkak më tepër për ta vizituar këtë metropol gjatë këtij muaji janë tulipanët, që gjenden kudo tani në Stamboll, në rrugë, në kopshte, në parqe.
Një tjetër ngjyrë, një tjetër vezullim, i japin tulipanët Stambollit. Prilli është muaji i tyre, festa e tyre.
Istanbul’da lale zamanı… /tesheshi.com/
