Theresa May është i pari autoritet qeverisës që e viziton Donald Trump-in në Shtëpinë e Bardhë që prej marrjes zyrtarisht të detyrës.
Vizita e kryeministres britanike është tregues i marrëdhënies së veçantë mes SHBA-së dhe Britanisë së Madhe, diçka e vënë në pah dhe në konferencën e përbashkët të shtypit në Uashington.
Shefja e qeverisë britanike e ka përgëzuar Trump-in për fitoren mahnitëse. Presidenti amerikan, nga ana e tij, ka deklaruar se ndjehet i nderuar që Theresa May kishte pranuar të ishte e para mes udhëheqësve të huaj që do ta vizitonin atë me nisjen e detyrës.
Aq i kënaqur duket të ketë qenë Trump nga vizita e kryeministres May, sa ai do ta quante Britaninë e lirë dhe të pavarur një bekim për botën.
Marrëdhënia midis dy vendeve, ka nënvizuar Donald Trump, ishte një forcë për paqe.
Trump ka pranuar gjithashtu ftesën e mbretëreshës Elizabet dhe do ta vizitojë gjatë këtij viti Britaninë, një aleate e kahershme e SHBA-së.
Në konferencën e shtypit është theksuar angazhimi ndaj NATO-s, edhe pse Trump nuk kishte ngurruar ditë më herët ta quante atë një organizëm të vjetruar.
Marrëveshjet tregtare midis dy vendeve kanë zënë vend po ashtu në bisedimet midis dy shtetarëve, teksa Theresa May do të thoshte se një marrëveshje e tillë do të ishte në interesin e përbashkët të SHBA-së dhe Britanisë.
Në lidhje me sanksionet ndaj Rusisë e me mundësinë e heqjes së tyre, Trump thjesht do të jepte këtë përgjigje: “Eshtë shumë herët për të folur për këtë.”
Megjithatë, ai do të shtonte se një marrëdhënie e madhe me vende si Rusia e Kina do të qe pozitive, jo negative.
May do të ishte fare e qartë në qëndrimin mbi sanksionet ndaj Rusisë, duke iu përmbajtur atij të BE-së.
“Ne duam ta shohim të zbatuar plotësisht marrëveshjen e Minskut,” ka thënë ajo, duke shtuar se sanksionet do të vijonin. /tesheshi.com/
