Një kamion mbi 5 ton me pije alkoolike dhe të gazuar, e që dyshohet se në Kosovë ka hyrë kontrabandë, është kapur dhe konfiskuar nga policia e Kosovës në veri të Mitrovicës, ndërsa që pronari dhe ngasësi i kamionit janë ndaluar nga policia për 48 orë, kanë njoftuar burime të portalit ‘Tesheshi’.
Ndaljen dhe konfiskimin e kamionit me pije e ka konfirmuar edhe policia në Mitrovicë.
“Një kamion të ngarkuar me pije alkoolike dhe të gazuara, e që dyshohet të ketë hyrë në Kosovë si mall i kontrabandë është ndalur dhe konfiskuar nga Policia e Kosovës”, ka thënë Zëvendësdrejtori i Policisë së Kosovës për veri Besim Hoti.
Hoti ka shtuar se në fillim policia e Kosovës edhe pse kishe kërkuar nga ngasësi i kamioni që të ndalon ai nuk ka ndaluar dhe pas rreth një orë ndjekje ai është ndaluar.
Policia me këtë rast ka arrestuar drejtuesin e kamionit si dhe pronarin e pijeve ndaje të cilëve me urdhër të prokurorit është caktuar masa e ndalimi prej 48 orësh, ka sqaruar Hoti.
Kamioni me gjithë mallin është dërguar në terminalin doganor në jug të Mitrovicës, ka shpjeguar njeriu numër dy i policisë së Kosovës në veri.
Policia gjithashtu është duke hetuar edhe mënyrën se si ka pasur mundësi që mbi 50 km të qarkullimit të kamionit në magjistralen e ‘Ibrit’, nga pikëkalimi kufitare G 1 në Jarinje të Leposaviqit e deri në hyrje të Mitrovicë, të mos ndalohet nga asnjë patrullë e policisë rrugore.
Lidhur me këtë shqetësim të policisë në veri, Hoti ka shtuar se kjo është çështje e policisë dhe ka shtuar se policia ka ndaluar kamionin që dyshohet se po transportonte mall kontrabandë.
Në anën tjetër burime të portalit ‘Tesheshi’, kanë njoftuar se policia e Kosovës në veri ka iniciuar hetimet rreth mos ndalesë së kamionit nga policia e që po barte mallra me akcizë e të kontrabanduar. Kamioni ka qarkulluar mbi 50 km në magjistralen e ‘Ibrit’, ndërsa që në atë kohë se paku dy patrulla të policisë rrugore është dashur të jenë nga Mitrovica deri në Leposaviq.
Po këto burime kanë njoftuar se pijet kontrabandë nuk kanë hyrë në Kosovë përmes pikëkalimit kufitare G1 në Jarinje të Leposaviqit, por është futur në Kosovës përmes rrugës alternative, pra përmes fshatit Tresavë.
E tërë kontrabanda e mallrave në Kosovë nga Serbia është duke u bërë nëpërmes rrugëve alternative, që gjatë vitit 2011 janë hapur nga struktura paralele të Serbisë që veprojnë në veri të Kosovës e në bashkëpunim me Qeverinë e Serbisë.
Në pjesën veriore të Mitrovicës dhe Kosovës, edhe përkundër vendosjes së doganierëve ndërkombëtarë dhe vendorë në dy pikat kufitare në veri, G 1 në Jarinje të Leposaviqit si dhe në G 31 në Bërrnjak të Zubin Potokut, kontrabanda është duke lulëzuar.
Burime të portalit kanë njoftuar nga veriu i vendit se “kontrabanda nga dy pikat kufitare është sjellë në një gjendej pothuajse normale si në çdo vend kalim tjetër të Kosovës.
“Nuk mund të themi që kemi arritur tërësisht ta parandalojmë këtë dukuri negative dhe të dëmshme për shtetin dhe ekonomin e Kosovës”.
Por sfidë për institucionet e sigurisë së Kosovës janë rrugët alternative që janë hapur nga strukturat paralele serbe, ka thënë burimi i portalit nga doganat e Kosovës.
Ai ka shtuar se pothuajse shumica e mallrave të akcizës janë duke u futur kontrabandë në Kosovës përmes rrugës alternative të fshatit Tresavë të Komunës së Leposaviqi, ku ka hyrë edhe kamion me pije. /tesheshi.com/
