Për herë të parë, tragjedia e Otrantos e fundmarsit të vitit 1997 do të vijë si një performancë artistike, gjë e cila nuk ka ndodhur deri më tani.
Do jenë, shqiptarja Hersiana Matmuja, si dhe italiani Mario Daniele, ata të cilët do të vënë në skenën e teatrit të Sarajevës historinë e anijes së mbytur me refugjatë shqiptarë, “Katër i Radës”, goditur nga ajo italiane, “Sibila”. Performanca, e cila bazohet në një melodi të trishtë shoqëruar me zëra, do jetë në kuadër Festivalit Ndërkombëtar të Teatrove në Sarajevë.
Siç informojnë autorët, pjesë e kësaj performance do të jetë edhe Grupi Polifonik Shqiptar i përbërë nga Nazo Çelaj, Valter Hodo, Sali Brahimaj, Nikolin Likaj dhe Meleq Çela. Ndërsa muzika është e Admir Shkurtajt, e regjia e Salvatore Tramaceres me libret të Alessandro Leograndes.
Hersiana Matmuja, një soprano e njohur e cila prej vitesh jeton në Itali, vjen në këtë eveniement si pjesë e Cantieri Teatrali Koreja, një qendër e prodhimit teatror. /tesheshi.com/
