I është përgënjeshtruar refreni i një prej këngëve të tij të njohura: Tonin Tërshanës, gjatë ditës së sotme.
“Lumturia s’dhurohet, nuk falet por fitohet”, ishte një lejtmotiv që u dëgjua për vite me radhë në eterin e radios dhe televizionet në vitet 80 të shekullit të fundit. Por tërshanës, sot në një moshë të thyer, bashkia e Tiranës i ka dhuruar një shtëpi të vogël diku larg, pranë një fushe të mbushur me ndërtime dhe një merimange telash të rrezikshëm që përhap një nënstacion elektrik i tensionit të lartë.
Tërshana, një yll i padiskutueshëm i muzikës së lehtë para 20 vitesh, pasi nuk i ka ecur jeta e emigrantit të Greqi, përfundoi i pastrehë dhe ka arritur të përfitojë nga ndarja e shtëpive falas që u shpërndanë nga bashkia e kryeqytetit.
Erjon Veliaj u ka dhënë çelësat e shtëpive sot 30 familjeve që përfitojnë nga 242 banesa sociale që janë ndërtuar në një lagje periferike të Tiranës, lagjen Shkozë, pranë ish- kombinatit të autotraktorëve, i cili në kohën e diktaturës prodhonte motorrë dhe pjesë këmbimi për “Zis”-at e tmerrshëm rus apo për “Zuk”-ët polakë që zotëronte jo me shumicë parku i varfër i ekonomisë komuniste shqiptare.
Tonin Tërshana, dikur një zë brilliant që këndonte këngët e kompozitorëve më në zë të festivaleve të muzikës së lehtë shqiptare, i quajturi “këndon kollaj” që sot banon me të gjithë të pastrehët, në një grumbull apartamentesh që jetën nuk do ta kenë të lehtë, edhe pse nuk paguajnë.
Ky bllok pallatesh u projektua më shumë se 11 vite më përpara por punimet përfunduan para katër vjetësh. Megjithatë ata u ndanë vetëm sot, pas një ecejakeje pushtetesh që prej vitit 2011. i ndërtuar me një kredi të bankës Botërore, gjithsesi këto apartamente nuk kanë realisht kushtet normale për të jetuar. Mjafton të shohësh fotot…/tesheshi.com/
