President i Republikës i ka sharë rëndë ata shtetas të tij që e kanë kritikuar se dekoroi disa ballistë; kurse Petro Koçi, zv.ministër i Mbrojtjes e ka quajtur Nishanin-ballist, duke nënkuptuar me këtë një fjalë të rëndë.
Me një gjuhë të ashpër, Presidenca ka reaguar duke hedhur poshtë të gjitha sulmet e adresuara, sipas saj, nga “nostalgjikët enveristë të diktaturës më të egër dhe të urryer të pasluftës së Dytë Botërore në Evropë, Diktaturës Hoxhiste”.
“Kujtimi dhe dekorimi i 67 nacionalistëve të ekzekutuar nga dora kriminale e një grupimi të bolshevikëve shqiptarë të orientuar nga të dërguarit jugosllavë, është një detyrim dhe përgjegjësi historike e Shqipërisë së sotme euro-atlantike”, thuhet në njoftimin e Presidencës.
Por duket se kreu i shtetit, nuk ka akuzuar historianët, por nominalisht kabinetin qeveritar. Edhe pse nuk ka përmendur emra, bëhet fjalë për Zv.Ministrin e Mbrojtjes, Petro Koçi, i cili me anë të një statusi në Facebook ka komentuar dekretin e Nishanit.
“President ballist. Dekorimi i bashkëpunëtorëve të fashizmit, thikë pas shpine dhe tradheti ndaj Luftës Antifashiste Nacional-Çlirimtare!”, shkruan Koçi.
E këtij statusi, presidenca i ka kushtuar një paragraf të tërë: “Institucioni i Presidentit të Republikës e konsideron të papranueshme ringjalljen e urrejtjes staliniste, veçanërisht kur ajo vjen nga anëtar të kabinetit qeveritar të një vendi anëtar i NATO-s dhe kandidat për Bashkimin Evropian.”
Por pas reagimit të Presidencës, Petro Koci, po me anë të një postimi në Facebook, ka sqaruar qëndrimin e tij, duke sulmuar sërish Presidentin Bujar Nishani.
“Rreshtimi i Presidentit në radhët politike të Ballit Kombëtar është një akt anti-nacionalist. Kjo dëshmon që e djathta nuk po distancohet dot nga ish-bashkëpunëtorët e fashizmit, ndryshe nga e majta që është distancuar qartazi nga fajet dhe krimet e komunizmit.
Të jesh kundër dekorimit të bashkëpunëtorëve të pushtuesit nuk të bën komunist.
Anti-ballistët nuk janë patjetër komunistë apo bolshevikë. Ashtu si anti-komunistet nuk janë të gjithë ballist. Presidentin ballist e kemi dhurate nga Sali Berisha”, shkruan Koçi.
/tesheshi.com/
