Nikolla Gruevski, Martin Protogjer, Ilija Dimovski dhe Leko Ristovski do të duhet t’i kthejnë shtetit 2.2 milionë euro në rast se Gjykata penale i shpall fajtorë në çështjen “Titanik”. Kjo është kërkesa e Prokurorisë Speciale Publike drejtuar gjykatës.
Prokurorët kanë dalë në konkluzionin se për financim të fushatës zgjedhore të vitit 2011, lideri i VMNRO- DPMNE, Nikolla Gruevski dhe ish shefi i kabinetit të Gruevskit, Martin Protogjer, duhet të kthejnë në buxhet 567 mijë euro. Për fushatën zgjedhore të vitit 2012, prokuroria kërkon nga Nikolla Gruevski, Ilija Dimovski dhe Leko Ristovski 673 mijë euro. Ndërsa për fushatën e vitit 2014, të pandehurit duhet të kthejnë një shumë prej 1 milion euro.
Në rastin “Titanik”, Nikolla Gruevski akuzohet për veprën penale bashkëpunim kriminal, keqpërdorim të mjeteve të fushatës zgjedhore dhe shkelje të rregullores zgjedhore.
Martin Protogjer përveç këtyre, akuzohet edhe për veprën penale të cënimit të lirisë së votuesve, ndërsa Mile Janakievski, përveç akuzave tjera, duhet të përgjigjet edhe për shkatërrim të materialit zgjedhor.
Deputeti Ilija Dimovski, njëlloj si Gruevski, akuzohet për keqpërdorim të mjeteve financiare të fushatës zgjedhore. /tesheshi.com/
