Thaçi paralajmëroi krijimin e një tjetër qeverie javën e ardhshme, për t’i prerë përfundimisht rrugën vijimit të kabinetit “Kurti”, pas rrëzimit të këtij të fundit me mocion mosbesimi në parlament. Pas disa letrave dërguar kryeministrit ende në detyrë për të sjellë tjetër emër nga VV, pra për një tjetër qeveri, Thaçi ka ndërmarrë atë që mund të quhet “plan amerikan” për zëvëndësimin e Albin Kurtit.
“Javën tjetër unë do të ndërmarr hapat e fundit kushtetues për të mundësuar formimin e një qeverie të re me një legjitimitet të plotë nga Parlamenti, e aftë për të luftuar # COVID19 dhe për t’i shërbyer popullit”, shkruan Thaçi, për t’u pasuar nga fraza e nxehtë: “Tarifat dhe reciprociteti duhet të bien për të forcuar mbështetjen e SHBA dhe BE për Kosovën”.
Ky hap i Thaçit ka marrë menjëherë një “Ok” amerikan, ku i dërguari Grenell, fill më pas, pos që postoi mesazhin e presidentit kosovar, shtoi dhe vetë:
“Pasi të bien tarifat / reciprociteti (mbase këtë javë?), Atëherë Dialogu fillon me zell. Unë kam folur me liderët në Serbi dhe Kosovë për të sqaruar se ata duhet të fillojnë të ndërtojnë besim sot në përgatitje – dhe ata janë angazhuar ta bëjnë këtë”.
Tashmë mbetet në pikëpyetje se cila do jetë ajo qeveri dhe cili do jetë ai kryeministër që do pasojë Kurtin me projektin amerikan? Siç dihet, LDK ka paralajmëruar koalicion me AAK-në dhe ndonjë forcë tjetër, për t’i mundësuar vetes qeverisjen e Kosovës pas ndarjes me VV-në. Por ndërsa Isa Mustafa rri “gatitu” para planit amerikan, Haradinaj vijon të jetë një kundërshtar i ashpër i heqjes së taksës. /tesheshi.com/
