Presidenti Thaçi ka reaguar për herë të parë me një gjuhë më të qartë kundër taksës doganore ndaj Serbisë, e këtë e ka bërë sapo ka nisur të reagojnë dhe SHBA.
“Suksesi ynë historik do të ishte i pamundur pa ndihmën e SHBA-së dhe aleatëve tjerë perëndimorë. Prandaj, duhet të jemi mirënjohës përgjithmonë.
Miqësia e Kosovës me SHBA-në është e përhershme, mirëpo përkrahja amerikane nuk mund të konsiderohet e pakushtëzuar në rast se ne bëjmë gabime që i vënë në pikëpyetje interesat dhe vlerat amerikane në Kosovë, rajon dhe Evropë. Vlerat tona dhe vizioni ynë përputhen me ato amerikane.
Zhvillimet aktuale dhe disa nga veprimet e institucioneve shtetërore janë duke u përcjellë me shqetësim nga qeveria amerikane. Kjo situatë është për keqardhje. Prandaj, tani është momenti t’i respektojmë këshillat miqësore amerikane, të cilat synojnë fuqizimin e shtetit të Kosovës dhe pacifikimin e rajonit.
Teket personale të asnjë lideri shtetëror nuk guxojnë të lëndojnë interesin tonë shtetëror dhe atë strategjik të SHBA-së për Kosovën e më gjerë. Veprimet populiste nuk guxojnë të cenojnë vizionin dhe vendimet strategjike të Kosovës.
Cenimi i raporteve me SHBA-në, i kësaj aleance të shenjtë, paraqet fillimin e cenimit të shtetit tonë”, shkruan Thaçi në një mesazh në FB.
Edhe pse nuk e përmend Haradinajn apo qeverinë e tij, aludimi është mëse i qartë.
Kujtojmë se kreu i qeverisë së Kosovës, duke iu përgjigjur edhe presionit amerikan pos atij europian për heqjen e taksës, ka thënë se kusht është një garanci ndërkombëtare se Serbia do e njohë Kosovën. /tesheshi.com/
