Makinat e para elektrike të prodhimit maqedonas priten në vitin 2024, njoftoi Jovan Despotovski, drejtor i Zonës Zhvillimore Teknologjiko-Industriale të Maqedonisë së Veriut (TIRZ).
Sipas Despotovskit, ndihma shtetërore për investimin e prodhuesit gjerman të automjeteve elektrike Next.e.GO Mobile do të realizohet në pesë vitet e ardhshme dhe “shteti ka mekanizma për mbrojtjen e interesit publik”.
Drejtoria për TIRZ, në emër të Qeverisë së Maqedonisë së Veriut, ka nënshkruar kontratë për ndihmë shtetërore për investimin e kompanisë gjermane, e cila parasheh prodhimin e plotë të makinave elektrike në Tetovë.
Pagat, dukshëm më të larta se mesatarja kombëtare
Ndërtimi i fabrikës do të fillojë këtë vjeshtë, dhe sipas kontratës, prodhimi provë pritet në vitin 2024.
Ky është qëllimi që investitori sipas planit të biznesit dhe kontratës së nënshkruar është i obliguar ta përmbushë”, tha Despotovski.
Investimi i kompanisë gjermane në Tetovë kap vlerën e 130 milionë eurove dhe planifikohet të hapen 900 vende pune, me paga bruto 2.5 herë më të larta se mesatarja e vendit.
Por meritën më të madhe për këtë investim gjigand në Tetovë e ka Lazim Destani, një prej njerëzve më të pasur të botës shqiptare, biznesmen tetovar, CEO i kompanisë Ecolog. Është ai që ia sjell këtë boom të pritshëm ekonomik qytetit të tij, kryeqendra shqiptare në Maqedoni pas Shkupit.
“Më i gëzuar se për investimin, jam për faktin se Tetovës, Maqedonisë së Veriut dhe të rinjve tanë, po u sjellim një mundësi të madhe punësimi e zhvillimi”, tha ai në një ceremoni.
Destani kujtoi kohën kur kish qenë vetë i ri, mërgimtar si shumica e të rinjve aso kohe dhe sot.
“Siç e theksova edhe në fjalën time gjatë ceremonisë së vendosjes së gurit të themelit, para 50 vitesh, unë mora rrugën e mërgimit drejt Gjermanisë për më shumë mundësi pune, e sot ndihem shumë i lumtur që po sjellim mundësitë e Gjermanisë këtu. Me këtë rast, po e përsëris thirrjen time për të gjithë afaristët, sidomos investitorët nga diaspora, që obligimin e tyre ndaj atdheut, ta realizojnë me investime në vendin dhe rajonin tonë”, tha Lazim Destani, i njohur për thjeshtësi, humanitet dhe atdhedashuri. /tesheshi.com/
