Ehud Olmert, ish-kryeministri izraelit, u dënua të hënën me tetë muaj burg për ryshfet dhe mashtrim.
Gjykata e Jerusalemit dha vendimin mbi çështjen Talansky, në të cilën Olmerti u akuzua se kishte marrë zarfa të mbushur me para nga afaristi amerikano-hebre Morris Talansky.
Ish-udhëheqësi izraelit u deklarua fajtor në mars për marrjen, përdorimin dhe fshehjen e së paku 153.590 dollarëve, të marra nga viti 1993 në vitin 2002 prej afaristit Talansky.
Dënimi me burg për Olmertin është i dyti, pas një dënimi tjetër me gjashtë vite burg të dhënë për të vitin e shkuar. Gjithashtu ai duhet të paguajë dhe një gjobë prej 25.000 dollarësh.
Olmerti, një ligjbërës për dekada, kryebashkiak i Jerusalemit për dy mandate, e më pas ministër i Tregtisë, Industrisë dhe Punës, u detyrua të japë dorëheqjen si kryeministër në vitin 2009 pas akuzave për korrupsion.
