Krerët e Bashkësive Islame të Kosovës dhe Bosnjës, përkatësisht Naim Tërnava dhe Husein Kavazoviç janë zgjedhur në mesin e 500 muslimanëve më me ndikim në botë për vitin 2017.
Në këtë listë janë përfshirë figura në bazë të ndikimit që ata kanë në bashkësitë e tyre, si dhe ndikimin që kanë patur si në botën islame ashtu edhe në prezantimin e Islamit jo-muslimanëve.
Publikimi i “500 muslimanëve më me ndikim në botë në vitin 2017”, në radhë të parë promovon “Top-Listën e 50 muslimanëve, ndikimi i të cilëve mund të ndihet në kontekstin ndërkombëtar”.
Si shpjegim për zgjedhjen e Kavazoviçit, përmendet puna e tij në dialogun ndërfetar me bashkësitë tjera fetare në Bosnjë, si dhe përpjekjet për të përfshirë gratë në punën e institucionit që ai drejton.
Ndërsa Muftiu i Kosovës, Naim Tërnava, është vlerësuar si një figurë kyçe në përpjekjet e popullsisë muslimane për të kapërcyer tmerret e luftës. Dhe ëshët evidentuar fakti se ai është një nga nismëtarët e Këshillit Ndërfetar të Kosovës.
Kavazoviç dhe Tërnava janë listuar në seksionin “Menaxhimi i çështjeve fetare”.
Ndërsa ish-Reis-ulema i Bashkësisë Islame të Bosnjës, Mustafa Ceriç dhe Enes Kariç, janë përzgjedhur si ndër muslimanët më me ndikim në çështjet shkencore, ndërsa Rusmir Mahmutqehajiç në ato shoqërore.
Në listë është përfshirë edhe ish-presidentja e Kosovës, Atifete Jahjaga tek “Politikanët”, por që paradoks ajo njihet si një ish-drejtuese shteti me deklarata aspak të pëlqyeshme për komunitetin e besimtarëve, sidomos për ato anti-shamisë së femrës.
Në listën e politikanëve më me ndikim është edhe australiani Ed Husiç, prindërit e të cilit janë me prejardhje nga Bosnja. Husiç u zgjodh në vitin 2010 deputet në Parlamentin e Australisë. Ai është muslimani i parë i cili është betuar duke vënë dorën e tij në Kur’an, në institucione politike jo-islame. /tesheshi.com/
