Udhëheqësi çeçen Ramzan Kadyrov tha sot se të gjitha qytetet që Rusia humbi në kundërsulmin e ushtrisë ukrainase në zonën e Kharkivit do të kthehen dhe se “djajtë e NATO-s” do të mposhten.
Ministria e Mbrojtjes e Rusisë njoftoi të shtunën se trupat ruse nga Balakleya dhe Izjum u rigrupuan në drejtim të Donetskut për të arritur qëllimet e operacionit special ushtarak për çlirimin e Donbasit.
“Ministria e Mbrojtjes sqaroi situatën, prandaj ata u larguan nga qytetet Izjum, Kupyansk, Balakleya, në drejtim të Kharkiv”, kujtoi lideri i Çeçenisë, raportoi RIA Novosti.
Kadyrov tha se 10 mijë luftëtarë janë gati të shkojnë atje.
“Së shpejti do të arrijmë në Odessa dhe do të shihni rezultate konkrete”, tha Kadyrov në një mesazh audio në kanalin e tij Telegram.
Kadyrov tha se nuk mund të fajësojë askënd për humbjen e qyteteve, sepse nuk është i njohur me thellësinë e strategjisë.
“Megjithatë, unë e di një gjë – Rusia do të fitojë, dhe këta djajtë e NATO-s dhe shërbimet e inteligjencës evropiane perëndimore, ata dhe armët e tyre do të shtypen nga shpirti i luftëtarëve tanë“, tha me bindje Kadyrov.
Megjithatë, deklaratat e tij s’mund të merren seriozisht. Më e pakta janë emocionale. Që nga nisja e agresionit rus ai ka bërë disa të tilla, pa qenë asfare në sinkron me atë që ndodh në realitetin e luftës.
Gjithashtu, për tërheqjen ruse nga Kharkivi nuk ka asnjë sqarim apo reagim nga Moska. /tesheshi.com/
