Tenton të vritet në paraburgim, një nga të arrestuarit e grupit “Kumanova”.
Siç njofton Alsat-M, Muhamet Krasniqi i njohur me nofkën Komandant Malisheva, ka pirë acid sulfurik, në një tentativë për t’i dhënë fund jetës së tij. Tretësira kimike e futur në trupin e tij, i ka shkaktuar një rrezik të madh, por mësohet se është dërguar menjëherë në spital ku i është bërë lavazh stomaku.
Siç njofton Alsat-M, asnjë nga organet e rendit publik në Maqedoni nuk ka dhënë informacion në lidhje me këtë incident edhe pse është pyetur zyrtarisht nga media në fjalë.
Para disa ditësh, avokatët e të akuzuarve për ngjarjen në “Lagjen e Trimave” treguan për mediat se nuk kanë pasur akses në dëshmitë e klientëve të tyre dhe akuzuan policinë e prokurorinë për shkelje të të drejtave të njeriut.
Ndërkaq, ditën e sotme nga Prokuroria është bërë e ditur se dëshmitë do tu jepen avokatëve vetëm kur të kompletohen. Rast i rrallë ky që të merret në pyetje i pandehuri pa praninë e avokatit.
“Në Prokurorinë Themelore Publike për ndjekjen e kriminalitetit të organizuar dhe korrupsionit, marrja në pyetje e të dyshuarve është në fazën finale, disa prej të dyshuarve gjatë ditëve në vijim duhet të merren në pyetje. Pas kompletimit të dëshmive, para përfundimit të procedurës hetuese të njëjtat do t’ju jepen për shqyrtim personave të dyshuar dhe mbrojtjes”, theksohet në një njoftim nga Prokuroria Publike e Maqedonisë.
Në ngjarjet e Kumanovës, humbën jetën 8 policë, ndërsa u vranë edhe 10 pjesëtarë të grupit, kurse të akuzuar janë 33 persona. /tesheshi.com/
