Seanca ditën e sotme ka degjeneruar sërish në fyerje dhe tensione mes dy forcave politike, Partisë Demokratike dhe Partisë Socialiste. Ajo që nisi fillimisht si replikë mes ish-kryeministrit Sali Berisha dhe deputetit të PS Taulant Balla, shpejt degradoi në fyerje dhe madje edhe tentativë për goditje fizike.
Ka qenë ish-kryeministri Berisha, që nuk i ka përmbajtur dot nervat dhe tensionin në replikat me Ballën duke iu drejtuar PS “jeni rracë e neveritshme”. E ndërsa replikat mes tyre vijuan në distancë, ka qenë deputeti tjetër i PD Asllan Dogjani, i cili është bërë pjesë e tensioneve duke hedhur replika nga vendi me Ballën.
Por në dy momente, ashtu edhe siç është kapur nga kamerat, Dogjani është ngritur dhe ka tentuar të qëllojë Ballën. Ka qenë kolegu pranë Dogjanit, që ka ndërhyrë duke e mbajtur për xhekete, duke shmangur kështu një incident të mundshëm fizik në Kuvend./tesheshi.com/
