Lulzim Basha ka lëshuar një frazë që mund të thuhet se është gati për të negocuar, por koha nuk pret dhe, nëse ai nuk e konkretizon deri nesër në mëngjes gjithçka mund të kthehet siç ishte.
Në një mbledhje të tensionuar grupi të deputetëve, kreu i PD-së është përballur me një dush të ftohtë nga ana e krerëve të PPE-së, madje edhe Presidentit të BE-së, Donald Tusk, që kanë asistuar live në të gjithë mbledhjen e grupit.
Krerët e Partive Popullore në videokonferencën nga Brukseli i kanë dhënë një ultimatum Lulzim Bashës dhe deputetëve të PD-së për të shmangur bojkotin, duke kërkuar njëkohësisht gatshmërinë për një marrëveshje me mazhorancën.
Kreu i Partive Popullore, Joseph Daul, ka dhënë disa mesazhe të forta për demokratët.
Ai ka thënë se bojkoti i parlamentit dhe zgjedhjeve është i papranueshëm.
Daul ka thënë se PD duhet të gjejë zgjidhje dhe kompromis me mazhorancën për të shkuar në zgjedhje.
Gjatë fjalës së tij, Daul ka thënë se çdo gjë tjetër është e papranueshme dhe e pavlefshme jo vetëm për PD-në, por dhe për Partitë Popullore ku bën pjesë PD dhe gjithë komunitetin ndërkombëtar.
Daul e ka pyetur Bashën nëse do të jetë i gatshëm që të pranojë draftin e propozuar nga Mcallister dhe Basha i ka thënë që do të shtonte edhe kërkesa të tjera.
Një tjetër personazh i rëndësishëm i Bashkimit Europian, Johannes Hahn, iu ka dërguar një mesazh demokratëve për t’i dhënë fund bojkotit dhe të marrin pjesë në zgjedhje.
“Duam angazhimin tuaj si parti politike brenda establishmentit politik.
Vetem kështu mund të gjejmë një zgjidhje për luftën kundër drogës”, thuhet në mesazhin e komisionerit Hahn. /tesheshi.com/
