Mijëra punonjës sezonalë që prisnin këtë kohë për të punuar në Greqi në mbledhjen e pemëtarisë po kthehen pas nga autoritetet në pikën e kalimit kufitar në Kapshticë. Ata thonë se ka ditë tashmë, që nuk lejohen të kalojnë në territorin grek, ndërsa autoritetet kërkojnë prej tyre garanci financiare deri në 3 mijë euro.
Përgjatë 24 orëve janë kthyer pas mbi 300 persona. Punësimi sezonal në Greqi është një aktivitet i përvitshëm për shqiptarët që punojnë atje për disa muaj dhe kthehen më pas në shtëpitë e tyre.
Kthimet janë raportuar prej disa ditësh dhe ende nuk ka një informacion zyrtar përse po ndodh një situatë e tillë. Autoritetet shqiptare të Kapshticës janë zotuar të kërkojnë të dhëna nga pala greke për të sqaruar përse janë shtuar këto masa, që duket se synojnë kalimin e punëtorëve për sezonin e mbledhjes së frutave e ullinjve në Greqi. /tesheshi.com/
