Tension dhe pasiguri një ditë para referendumit për pavarësinë e Katalonjës nga Spanja.
Ndërkohë që kryeministri Mariano Rajoy ka dërguar policinë speciale të ndërhyjë, Carles Puigdemont, lideri indipendist e ka cilësuar Spanjën një shtet totalitar që ka përfunduar.
“Kemi fituar që sot, pasi mundëm frikën, kërcënimet, presionin, gënjeshtrat dhe shantazhet e një shtetit totalitar. Tani le të prekim atë që ka qenë një ëndërr për ne, pavarësinë”, tha Puigdemont në mitingun final.
5 milionë e 300 mijë zgjedhës janë thirrur të dielën që të votojnë për pavarësinë e Katalonjës, në 6300 shkollat e rajonit verilindor të Spanjës.
Qeveria e Madridit ka dërguar 10 mijë forca policie në të gjithë rajonin që të ndalojë zhvillimin e referendumit.
Ndërkohë, që prej mbrëmjes së djeshëm qytetarë të shumtë kanë “okupuar” vendvotimet për të mos lejuar që policia të ndërhyrë me dhunë.
Kryeministri spanjoll ka deklaruar se sipas kushtetutës së vitit 1978 shteti mund të ndërhyjë me forcë për të shtypur përpjekjet separatiste. /tesheshi.com/
