Të zhdukurit e luftës së Kosovës, “Thirrjet e nënave”: të jenë në tryezën e Brukselit

Edhe 17 vjet pas përfundimit të luftës në Kosovë, 1660 persona llogariten ende të pagjetur, prej tyre 75 për qind shqiptarë dhe të tjerët minoritete..

Familjarët e të të zhdukurve kërkojnë që fati i të afërmve të tyre të pagjetur të jetë temë e bisedimeve në Bruksel.

Nysrete Kumanova, drejtuesja e shoqatës “Thirrjet e nënave”, thotë se shumë prindër kanë ndërruar jetë në pritje të zbardhjes së fatit të fëmijëve të tyre, të rrëmbyer nga forcat serbe dhe të zhdukur po nga ta.

“Ne duam që çështja e të pagjeturve të ngrihet edhe në Bruksel. Institucionet tona po heshtin totalisht për këtë çështje, ata vetëm po na lyejnë ‘kokën me akull’ dhe nuk ka asgjë”, thotë Kumnova, për “Zërin”.

Familjarët e të pagjeturve kanë paralajmëruar bojkotimin e zgjedhjeve të ardhshme, kurdo që do të mbahen ato.

“Kurrë më. Nuk do të dalim në zgjedhje, nuk kemi kë të zgjedhim. Nuk po e përfaqësojnë interesin tonë”, thotë Kumnova, e cila ka të zhdukur djalin e vetëm dhe thotë se po kërkojmë vetëm eshtrat e tyre.

“Tashmë është e kuptueshme se ata nuk janë gjallë, ne po kërkojmë vetëm eshtrat e tyre dhe këto nuk po na japin. Duam të kemi varre për ta”, ka thënë ajo.

Ndryshe, disa vende janë të identifikuara sikurse në Kosovë, po ashtu edhe në Serbi të dyshuara si varreza masive. Në këto vende të dyshuara Komisioni Qeveritar për Persona të Pagjetur ka konfirmuar se nuk janë bërë as gërmime vlerësuese. Sipas anëtarëve të këtij Komisioni, zbardhja e fatit të të pagjeturve po zvarritet nga Beogradi. /tesheshi.com/