Nga Ermir Hoxha
Kryeministri Rama i është kthyer kohës së hershme kur u përball me Berishën për herë të parë në PD, atje ku sipas Ramës kishte njohur edhe “mllefin” që Berisha kishte për shtresën e ish-të përndjekurve politikë.
“Sali Berisha i quante ata llumi i shoqërisë. Pra problemi ishte ideologjik, ishte organik. Ai nuk e pranonte dot këtë shtresë. E konsideronte racë tjetër, sepse ishte komunist. E konsideronte këtë kategori si shtresë të përmbysur, sepse ishte komunist, sepse kjo ishte retorika komuniste”, ka thënë Raman në një intervistë të vitit 2012, dhënë për librin “Pardesytë e Bardha”, me autore gazetaren e njohur të dossier-it politik, Luljeta Progni.
Ai sqaron në atë intervistë momentin e tij të parë e të fundit në PD, atje ku u ndesh, siç i quante, me mendësitë komuniste të liderit Berisha e prej të cilit u largua menjëherë.
“Atë ditë, kur hyra në PD, ose më saktë kur shkova në PD, e cila sapo ishte krijuar, u largova menjëherë, sepse pata një konflikt me ata që gjeta aty, pra në PD. Ne ishim shumë më përpara, sepse në bisedat tona kishim një tjetër pritshmëri dhe strategji për të ardhmen. Për ne Ramiz Alia ishte kundërshtari. Për ne Ramiz Alia nuk ishte njeriu që po sillte demokracinë në Shqipëri, por ishte thjesht regjimi komunist në Shqipëri. Ky është edhe konflikti, që unë pata me ata që gjendeshin në atë kohë në PD”, thotë Rama.
Biseda me Imamin
Rama sqaron edhe përpjekjet e Arben Imamit për ta mbajtur në PD pasi si parti e sapothemeluar kishte nevojë për intelektualë në zë si Edi Rama.
“Beni më thoshte “po jo, se kemi nevojë për disa intelektualë pak më në zë, që t’i japim peshë dhe seriozitet të gjithë kësaj që po bëjmë, sepse është një gjë që sapo ka filluar, ne s’kemi eksperiencë”. Ndërsa unë i thashë, se Sali Berisha është komunist tipik dhe ka të gjithë eksperiencën si sekretar partie që t’ju eleminojë të gjithëve. I kam thënë, se ai do ta bëjë PD një vegël të Ramiz Alisë dhe ju nuk do të jeni dot në gjendje të flisni kundër Enver Hoxhës. E vërteta është, se ditën kur fola kundër Enver Hoxhës në Akademinë e Arteve, ata nuk flisnin dot kundër Enver Hoxhës. E vërteta është, se Sali Berisha ishte Ramiz Alia në atë çfarë përfaqësonte”, thotë Rama. /tesheshi.com/
