Edhe pse përfaqësuesja e Belgjikës ka ardhur në këtë Europian pas një mungese të gjatë, ajo është parë si një prej pretendentëve për ta fituar atë. E kjo falë yjeve që ka në gjirin e vet, duke filluar nga portieri Courtois, Vermaelen, Fellaini, Nainggolan, Hazard, De Bruyne, Lukaku, Mertens e Origi.
Por belgët dështuan në mënyrë spektakolare në mbrëmjen e së hënës, duke humbur ndaj Italisë e duke bërë një paraqitje zhgënjyese.
Në anën tjetër, mungesa e cilësisë së lojtarëve e bënte Italinë, finalisten e katër viteve të shkuara, të ngjante lehtësisht e kalueshme nga belgët. Krejt e kundërta ka ndodhur. Disiplina dhe të luajturit si një ekip i ka dhënë suksesin Italisë në takimin e parë të tyre.
Italia do të fitonte 2-0 ndaj Belgjikës, me golat të shënuar nga Giaccherini e Pellé, për t’u renditur e para në grupin E, si e vetmja skuadër me tre pikë të plota.
Rio Ferdinand, ish-mbrojtësi i Mançester Junajtedit, në rolin e komentatorit sportiv tanimë, do ta përshkruante kështu fitoren e Italisë: “Ky ishte shembulli i përsosur i një përfaqësueseje që luan si një ekip, e i një tjetre që luan si një grup individësh.”
Gianluca Vialli, ish-sulmuesi i Italisë, do të kishte pak a shumë të njëjtin mendim: “Ne (Italia) ishim thuajse të përsosur. E dominuam ndeshjen, treguam dëshirë dhe angazhim, e luajtëm si një ekip. Kishim një plan të përsosur loje.”
Në një grup me Suedinë e Irlandën, për belgët bëhet tani i vështirë objektivi i kalimit të grupit. Në të kundërt, Italia ka hedhur një hap thuajse të sigurt për përmbushjen e të njëjtit synim. /tesheshi.com/
