Pasditen e 22 tetorit, Valencia luante me Barcelonën në “Mestalla”. Vendasit do të bënin një paraqitje mjaft të mirë, e madje do të kryesonin për minuta të tëra.
Ndërsa ndeshja po shkonte drejt një barazimi, gjyqtari jep një 11-metërsh për katalanasit në minutat shtesë. Messi godet topin nga pika e bardhë dhe shënon, duke i dhënë fitoren kështu Barcelonës.
Gëzimi zhvendoset në krah të portës së Valencias, karshi tifozëve vendas. Njëri prej tyre hedh një shishe uji mbi lojtarët e Barcelonës.
Reagimi i katalanasve qe më tepër një shfaqje teatri, duke nxitur debate në orët pasuese, por kjo nuk e ka shpëtuar tifozin e Valencias.
Komisioni disiplinor përkatës e ka gjobitur tifozin me 3.001 euro, ndërkohë që ai është dënuar dhe me një lënie jashtë stadiumit për gjashtë muaj.
E njëjta gjobë dhe i njëjti dënim është dhënë dhe për një tifoz të Selta Vigos në një ndeshje ndaj Ajaksit në Ligën e Europës. /tesheshi.com/
