Ka bërë përshtypje deklarata e kryeministrit Edi Rama nga Korça, në fund të konferencës për shtyp me homologun e tij të Kosovës, Ramush Haradinaj.
“Të fala Baton Haxhiut!”, ka qenë batuta e Edi Ramës, që për shumë vetë nuk u kuptua përse, apo u dhanë shumë variacione mbi një “temë të lirë”. Përse ta ketë thënë Rama vallë, falmeshëndet-jen e fundit politike ndaj një gazetari që nuk e ka quajtur “kazan”?
Kush ka qenë i vëmendshëm në politikën shqiptare e mban mend një batutë të ngjashme që Rama kishte rreth12 vjet më parë, kur ende kishte flokë dhe mjekrrën e kishte të zezë.
Pikërisht, sapo u zgjodh kryetar i PS-së, iu vu fuqishëm televizionit Klan i cili për 8 vjet opozitë e luftoi fort Edi Ramën, por që sot është patneri kryesor në qeveri.
“Të fala Sandrit!” u thoshte atëherë Rama reporterëve të Klanit që i drejtonin mikrofonin dhe e pyesnin për gjësendi. Por së fundi Rama zgjodhi Baton Haxhiun si target i shpotitjes së tij që ka një kod gjithsesi.
Cili ishte kodi i Ramës në përmendjen e Batonit? Ajo që nuk e ka më këshilltar të afërt, apo që Batoni nuk ka qenë aktiv shumë në avokatinë ndaj mikut të tij kryeministër.
Artikulli i fundit i Batonit është i 26 tetorit për çështjen “Tahiri”, ku u tregua “as mish e as peshk”.
Mos ishte një mesazh për t’u riaktivizuar fort këto ditë kur analistët po e sulmojnë kryeministrin nga të gjitha anët? Apo për të dhënë një mesazh tek kundërshtarët që ai nuk e ka më Batonin apo vetëm Batonin, por ka hapësirë për të futur shumë pjesëtarë të “kazanit” në “sqetullën kryeministrore”. Një manovër për të treguar karrotën e jo shkopin ndaj “aktorëve të kazanit”.
Vibrimet e kësaj klime padyshim që do të vihen re së shpejti, që në orët e ardhshme. Pasi një pjesë e “analistëve”, më shumë se radiografia e situatës në vend, iu ka interesuar ç’kodimi i mesazheve të udhëheqësve.
E kemi ves që nga koha e Zogut e Enverit. /tesheshi.com/
