Qeverisja bashkëpunuese për ndërtimin e paqes është tema që ka mbledhur në Seul të Koresë së Jugut rreth 1.100 liderë nga 120 shtete, përfaqësues të shoqërisë civile, medies, botës akademike dhe ekspertëve të drejtësisë.
Ne samitin treditor në emër të Aleancës Botërore të Religjioneve për Paqe (WARP), organizuar nga organizata joqeveritare Kultura Hyjnore, Paqja Botërore dhe Rikthimi i Dritës (HWPL), u adresuan masat që duhen ndërmarrë për të vendosur bashkëpunimin ndërmjet qeverive, shoqërisë civile dhe organizatat ndërkombëtare me synim arritjen e paqes së qëndrueshme.
“Hapi më i rëndësishëm është ndalja e luftërave. Deklarata për Paqe dhe Përfundimin e Luftërave e draftuar nga ekspertë të drejtësisë ndërkombëtare ofron qasje praktike për të parandaluar konfliktin. Nëse udhëheqësit e duan popullin e tyre ata duhet të punojnë për të zbatuar masat për ndërtim të paqes”, ka thënë Man Hee Lee, kryesues i HWPL.
Në anën tjetër, ish-Presidentja e Kosovës, Atifete Jahjaga, ka folur për përvojën e republikës së re për zhvillimin e paqes së qëndrueshme.
“Nuk mund të gjej një vend më të përshtatshëm për të folur për paqen se sa Koreja, shtet i cili është ngritur nga rrënojat e një lufte shkatërruese për të ndërtuar dhe transformuar veten duke u bërë burim i stabilitetit dhe lider në mesin e shteteve që përpiqen të ofrojnë perspektivë të qëndrueshme, jetë të dinjitetshme dhe me mundësi të plota për qytetarët e vet.
Me ndihmën e shumë shteteve demokratike të cilat i erdhën në ndihmë popullit të Kosovës, ne kemi kaluar dy dekadat e fundit duke rindërtuar marrëdhëniet ndërmjet të etnive dhe religjioneve dhe kemi punuar shumë që ta kthejmë besimin dhe paqen, në mënyrë që ngjarjet e viteve ’90 të mos ndodhin më në Ballkan”, ka deklaruar ajo.
Në mesin e pjesëmarrësve nga shtetet e Ballkanit ndodhet edhe ish-presidenti i Kroacisë, Ivo Josipoviç, përfaqësues qeveritarë nga Maqedonia, Mali i Zi dhe Bosnja. /tesheshi.com/
