Presidentja e Republikës së Kosovës, Atifete Jahjaga, është munduar edhe sot t’i bindë qytetarët e Kosovës që mos ta braktisin vendin me idenë për të kërkuar azil në ndonjë nga vendet e Bashkimit Evropian.
Pak kohë më parë ajo ka vizituar qytetin e Mitrovicës, ku e shoqëruar nga i dërguari i Ballkanit Perëndimor në Ministrinë e Jashtme të Gjermanisë, Ernst Reichel, ka biseduar me qytetarë rreth çështjes së migrimit.
E para e vendit është shprehur e bindur se të gjithë ata qytetar që kanë marrë rrugën për në “botën perëndimore” do ta kenë fatin e njëjtë – kërkesat e tyre për azil do të refuzohen dhe më pas do të kthehen në Kosovë.
Ndërkaq, i dërguari i qeverisë gjermane për Ballkanin perëndimor, Ernst Reichel, ka thënë se shprehë mirëkuptim për gjendjen e rëndë në të cilën ndodhen qytetarët kosovar, por gjithashtu e ka përkrahur çdo gjë që është thënë nga presidentja Jahjaga.
Ai premtoi mbështetjen e Gjermanisë brenda mundësive të saj, në mënyrë që të krijojë një perspektivë më të mirë për qytetarët e Kosovës.
“Nuk është zgjidhje që të shkoni për disa javë ose muaj në Evropë me mjetet të cilat i keni fituar nga shitja e pasurisë tuaj, dhe pasi të ktheheni në Kosovë do të jeni në gjendje më të rëndë sesa keni qenë më parë. Nuk ka qëndrim të përhershëm në Gjermani përmes kanaleve ilegale ose kërkesave të azilit”, theksoi Reichel./TeSheshi/
