Media të caktuara në Maqedoni, gjatë ditës së djeshme kanë përcjellë si lajm ekskluziv një takim privat të kryetarit të degës së Çairit nga Lëvizja BESA, dhe kandidat potencial për ta udhëhequr këtë komunë në zgjedhjet lokale, dhe zv/kryeministrit për çështje europiane, Bujar Osmani.
Duke u bazuar në foton e përbashkët ndërmjet këtyre dy funksionarëve partiakë, ata kanë akuzuar Bekim Salin se po bashkëpunon me BDI-në.
Mirëpo për zbardhjen e të vërtetës së këtij takimi, u përkujdes aktori i njohur shqiptar nga Shkupi, Ismet Ramadani.
Ai fillimisht nëpërmjet rrjetit social facebook kishte shprehur habinë e tij se për çfarë arsye një takim privat i festimit të 20 vjetorit të maturës nga shkolla e mesme, ka pasur nevojë të trajtohet si lajm, e aq më tepër të keqtrajtohet.
Ismet Ramadani është ish-shoku i klasës së dy funksionarëve politikë, Bekim Salit dhe Bujar Osmanit.
Ramadani në një prononcim për portalin tesheshi.com ka përgënjeshtruar gjitha pretendimet tendencioze të portaleve lidhur me takimin në fjalë, dhe njëkohësisht ka sqaruar situatën.
“Është për të ardhur keq se si interpretohet një takim privat. Foto, e cila është botuar në media me tituj të ndryshëm për ish-shokët e klasës, Bekim Sali dhe Bujar Osmani është shkrepur gjatë festimit të 20 vjetorit të maturës. Ideja e këtij takimi u realizua nga disa shokë klase dhe këtu nuk ka asgjë të keqe”, deklaroi për tesheshi, Ismet Ramadani.
Siç rrëfen Ramadani, ata kanë qenë gjenerata e parë shqiptare e shkollës së mesme të mjekësisë në “Pançe Karagjozov”.
“Si gjenerata e parë e kësaj shkolle të mesme, sot thuajse të gjithë janë profesionistë në fusha të caktuara”, përfundoi për tesheshi.com Ramadani.
Siç duket, BDI-ja dhe portalet e saj janë shumë të shqetësuara me kandidaturën e Bekim Salit dhe mundohen në çdo mënyrë të dëmtojnë emrin e tij. Megjithatë, tashmë të gjithë janë të bindur se Çairi tashmë është punë e kryer më favor të Lëvizjes Besa. /tesheshi.com/
