Pas takimit me N/Sekretarin amerikan Hale, edhe Thaçi e Veseli kanë shprehur konsiderata, por duke iu shmangur interesit të opinionit për atë çfarë është më kryesore, se cili vijon të jetë qëndrimi amerikan ndërsa taksa nuk po hiqet.
“Biseduam edhe për zhvillimet aktuale në Ballkanin Perëndimor, me theks të veçantë për vazhdimin e dialogut në mes të Kosovës dhe Serbisë në këtë momentum të ri, si mundësi për një marrëveshje përfundimtare dhe gjithëpërfshirëse, që do t’i mbyllë të gjitha çështjet e hapura në mes të vendeve tona. Pra, për një marrëveshje ligjërisht obliguese, që do të sjellë njohjen reciproke dhe ulësen në Kombet e Bashkuara dhe që do të na mundësojë që të kalojmë nga gjendja e armiqësisë së përhershme në një gjendje të paqes, normalitetit dhe bashkëpunimit mes vendeve tona”, tha Thaçi në Facebook.
“Në takim, theksova se qëllimet e Kosovës mund të arrihen vetëm duke ruajtur dhe duke fuqizuar partneritetin e përjetshëm ndërmjet Kosovës dhe SHBA-ve. Po ashtu, z. Hale i shpreha qëndrimn tim të vendosur që për asnjë arsye nuk do të lejoj rrezikimin e raporteve ndërmjet Kosovës dhe SHBA-ve dhe se veprimet tona të ardhshme do të jenë të koordinuara me SHBA-të”, ka thënë Veseli po në Facebook.
Ndërkohë, prej diplomatit amerikan deri më tani ka dalë vetëm ky qëndrim: “Asgjë nuk ka ndryshuar në përkushtimin tonë”, ka thënë Hale. /tesheshi.com/
