Kreu republikan Fatmir Mediu ka reaguar përmes një komenti në rrjetet sociale mbi planin për krijimin e një zone ekonomike në Ballkanin Perëndimor, që u diskutua edhe në takimin e 6 kryeministrave, në prani të Komisionerit për Zgjerimin, Johannes Hahn.
Për Mediun ideja e një tregu ballkanik nuk është e re për historinë e rajonit, por deri më tani kryeministri Edi Rama nuk ka treguar asgjë konkrete në lidhje me planin në të cilin bën pjesë.
Sipas Mediut, Rama duhet të kërkojë menjëherë mendimin e ekspertëve të ekonomisë, pasi ata mund të sqarojnë më së miri nëse nga ky plan, Shqipëria përfiton apo humb më shumë, si dhe se çfarë pozicioni do t’i japë kjo politikë vendit në skakierën e vogël të rajonit.
Në vijim, Mediu ironizon Ramën, duke thënë se nuk pret prej kryeministrit të Shqipërisë dhe “vëllait” të tij Aleksander Vuçiç, që të japin vendime për ekonominë e rajonit, duke shtuar se një aktor i rëndësishëm që po lihet jashtë është dhe SHBA.
“Kjo marrëdhënie nuk mund të jetë monopol i një njeriu qoftë ky kryeministri.
Ai duhet të jete rezultat i nje gjykimi ekspertësh të ekonomisë dhe vendimi gjithpërfshirës pokitik, mbi të gjitha më shumë transparencë me opinionin publik.
Po ashtu ekspertët duhet të vlerësojne faktin se në këtë garë të vendeve të Ballkanit për të perfituar nga mbështetja e BE për këtë marrëdhënie të re, sa kompetitiv jemi ne si vend.
Deri tani ne kemi dështuar të tërheqim fonde nga BE apo në kuadër të iniciativës së Berlinit”, shkruan Mediu në rrjetet sociale. /tesheshi.com/
