Tahiri: ta bëjmë Shqipërinë si policinë!

Ish-ministri i Rendit, Saimir Tahiri ka folur për herë të parë që pas largimit nga dikasteri që ai drejtoi për më shumë se tre vjet, duke qenë më shumë se një kampion suksesi, siç e cilësoi eprori i tij politik, Rama, një kampion akuzash nga opozita.

I pranishëm në panairin e policisë në kuadër të Ditës së Verës, Tahiri i thurri lavde sektorit që drejtoi duke bërë një paralele mes Shqipërisë dhe policisë. “Kjo është Policia që duam, e siç kemi bërë Policinë do bëjmë gjithë Shqipërinë. Me sa pasion e forcë kemi punuar për të bërë Policinë e Shtetit, kemi bërë dhe për ekonominë e punësimin, e shumë më shumë do bëjmë akoma në vazhdim. Dua të falënderoj çdo qytetar që na ka dhënë shpresë e besim gjatë gjithë kësaj kohe, duke i garantuar që kemi më shumë forcë, më shumë besim, më shumë fuqi për të ecur përpara për Shqipërinë që duam”, tha Tahiri.

Ai shtoi më tej se “njerëzit kanë besim se gjërat do ecin më mirë në këtë vend”, duke thënë se “shumë kemi bërë, shumë kemi për të bërë përkundër shumë kemi për të humbur nëqoftëse kthehemi mbrapsht”.

Ndërkohë, për opozitën, Saimir Tahiri mbetet një ministër i lidhur me krimin dhe drogën. /tesheshi.com/