Reali kundër Atletikos, Zinedine Zidane kundër Diego Simeones, një filozofi sulmuese kundër një filozofie mbrojtëse, ekipi i vendit të tretë në La Liga kundër atij të vendit të dytë: kjo është sfida e kësaj të shtune.
Derbi i kryeqytetit spanjoll, përplasja e dy finalistëve të Champions League-s dy vite të shkuara, luhet sot pasdite, në një orar disi të pazakontë, në 16:00.
Një ndeshje ku humbja për njërën palë thuajse e nxjerr atë krejtësisht nga lufta për titull. E po kështu dhe barazimi, që nuk i vlen asnjërës skuadër.
Do të luhet për gjithçka, në derbin e parë për francezin Zidane si trajner i Realit të Madridit.
“Sezoni ynë nuk mbaron nesër (sot),” deklaron ai. “Ajo që ka rëndësi për mua është të luajmë mirë. Eshtë një derbi, por është thjesht një ndeshje tjetër. Çfarëdo që të ngjasë, nuk do të lëshojmë pe gjer në fund.”
Në anën tjetër, Simeone e çmon Realin veç si një kundërshtar, pa e dramatizuar situatën: “E vlerësoj Realin e Madridit si thjesht një kundërshtar tjetër. Ata nuk janë rivalë më të mëdhenj apo më të vegjël se dikush tjetër.”
Takimi i parë mes tyre në këtë kampionat, i luajtur në fushën e Atletikos më 4 tetor të 2015-ës, ka përfunduar 1-1, me golat të shënuar nga Benzema dhe Vietto.
Atletiko pozicionohet aktualisht në vend të dytë në klasifikimin e kampionatit spanjoll, me 55 pikë, e menjëherë nga pas vjen Reali, në vend të tretë, me 54 pikë. 17 janë ndeshjet e fituara nga Atletikoja në 25 javë, me golavarazhin +24, ndërsa Reali ka fituar 16 takime, me një golavarazh të jashtëzakonshëm, +47, shifër të cilën e ndan vetëm me Barcelonën.
Derbin e kësaj pasditeje do ta gjykojë 43-vjeçari nga Saragoza, Carlos Clos Gomez. /tesheshi.com/
