Të paktën 13 persona kanë vdekur dhe 60 të tjerë janë plagosur pasditen e së enjtes në Barcelonë, kur një furgon është përplasur me këmbësorët në një zonë turistike.
Nga raportimet mësohet se të paktën dy pengmarrës po mbajnë peng në një restorant një numër personash, ndërsa sipas “Daily Mail” se policia po negocion me pengmarrësit.
Dëshmi nga vendngjarja tregojnë se një furgon u drejtua përmes turmës së këmbësorëve, në momentin që ata kalonin nga njëri trotuar në tjetrin. Policia konfimoi përplasjen “masive”, por dëshmitarët thonë se kanë dëgjuar edhe të shtëna armësh.
“Las Ramblas” konsiderohet si sheshi ikonë i qytetit, i frekuentuar shumë nga turistët.
Driss Oukabir është njëri nga autorët e dyshuar të sulmit. Ai ka lindur në Marok në vitin 1989, ndërsa nga të dhënat e para ishte i skeduar nga policia spanjolle si pjesë e grupeve terroriste.
Autoritetet konfirmojnë jozyrtarisht se bëhet fjalë për një sulm terrorist në kryeqendrën e Katalunjës.
Linjat e metrosë u mbyllën menjëherë, sikurse edhe dyqanet përreth zonës, ndërsa këmbësorët vraponin nga të katër anët në kërkim të strehimeve të sigurta, teksa policia zbarkoi me forca të shumta në zonë.
Gazeta “El Pais” njofton se drejtuesi i mjetit është larguar në këmbë pasi përplasi dhjetëra këmbësorë, ndërsa raporte të tjera thonë se dy persona të armatosur kanë hyrë në një restorant pas sulmit. /tesheshi.com/
