Presidenti amerikan Donald Trump ka aprovuar dërgimin e trupave amerikane në Arabinë Saudite për të forcuar mbrojtjen ajrore të vendit pas sulmit me dronë të shtunën e kaluar mbi objektet e naftës, për të cilat Uashingtoni fajëson Iranin, dhe pse Teherani mohon përgjegjësinë.
Pentagoni njoftoi të premten se një numër i moderuar i trupave do të dërgohen në Arabinë Saudite dhe se natyra e operacioneve të tyre do të jetë kryesisht mbrojtëse. Gjenerali i marinës amerikane Joseph Dunford, Komandanti i Përgjithshëm, tha që dislokimi nuk do të përfshinte mijëra trupa, por nuk dëshironte të fliste më në detaje.
Edhe Sekretari i Mbrojtjes i SHBA, Mark Esper ka njoftuar se Pentagoni do të angazhojë ushtrinë amerikane në Lindjen e Mesme.
“Presidenti ka aprovuar vendosjen e forcave amerikane, të cilat do të jenë në natyrë mbrojtëse dhe kryesisht të përqendruara në mbrojtjen ajrore dhe raketore”, tha Esper, duke shtuar se Arabia Saudite kishte kërkuar mbështetje. “Ne gjithashtu do të punojmë për të përshpejtuar dërgesat e pajisjeve ushtarake në Arabinë Saudite dhe Emiratet e Bashkuara Arabe për të forcuar aftësinë e tyre për t’u mbrojtur”, shtoi ai.
Ai përsëriti që SHBA nuk po kërkonte një konflikt me Iranin dhe i bëri thirrje Teheranit të kthehej në kanale diplomatike. Njoftimi për vendosjen e trupave amerikane duket se ka mbyllur derën e çdo vendimi në afat të shkurtër për hakmarrje ndaj Iranit në vazhdën e sulmit ndaj objekteve të naftës saudite, të cilat kanë tronditur tregun global të naftës dhe zbuluan vrima të mëdha në mbrojtjen ajrore të vendit.
Sulmet ajrore të telekomanduara më 14 shtator në uzinat Khurais dhe Abqaiq të Arabisë Saudite konsiderohen si një provim i vullnetit të botës për të ruajtur rendin ndërkombëtar. Ai ka qenë agresioni më i madh kundër infrastrukturës së naftës në Gji që nga koha kur Saddam Hussein i vuri zjarr fushave të naftës Kuvajtit në 1991.
Irani hedh poshtë akuzat se është pas sulmit që fillimisht përgjysmoi prodhimin e naftës të Arabisë Saudite, eksportuesi më i madh në botë i naftës. Huthinjtë e Jemenit, një lëvizje afër Iranit që lufton me Saudinë për katër vjet, ka marrë përgjegjësinë.
Shtetet e Bashkuara njoftuan më herët gjithashtu masa të reja kundër bankës qendrore të Iranit dhe fondit sovran të Teheranit për “financimin e terrorizmit”, të cilin Trump i përshkroi si “sanksionet më të rrepta të vendosura ndonjëherë ndaj një vendi”.
Sekretari i Thesarit Steven Mnuchin shpjegoi se ata po synojnë “burimin e fundit të të ardhurave për bankën qendrore iraniane dhe Fondin Kombëtar të Zhvillimit, fondi i tyre i pasurisë sovrane që do të shkëputet nga sistemi ynë bankar”.
“Kjo do të thotë se nuk do të ketë më para për Rojet e Revolucionit, ushtrinë elitare të autoriteteve iraniane, për financimin e terrorizmit”, shtoi ai. /tesheshi.com/
