Suedia është objektivi i një fushate dezinformimi nga “aktorët e mbështetur nga Rusia” që synon të dëmtojë kandidatin e NATO-s duke nënkuptuar se vendi mbështet djegien e Kuranit, pretendon qeveria e Stokholmit.
“Suedia është objektivi i një fushate dezinformimi të mbështetur nga aktorë shtetërorë me qëllim dëmtimin e interesave suedeze dhe qytetarëve suedezë”, shkroi kryeministri Ulf Kristersson në Instagram.
Kandidatura e Suedisë për anëtarësim në NATO pas pushtimit rus të Ukrainës është një nga temat qendrore të publikut botëror.
Rastet e djegies së Kuranit në Suedi kanë zemëruar muslimanët anembanë botës, ndërsa presidenti turk Rexhep Tajip Erdogan, vendi i të cilit ka bllokuar prej kohësh pranimin e Suedisë në NATO, madje vuri në dyshim nëse Suedia mund të ishte një kandidate për Aleancën.
Siç raporton The Guardian, kryeministri suedez shtoi se djegiet e fundit të Kuranit ndodhën gjatë një “situate të vështirë sigurie”.
“Ato ngjarje janë raportuar gabimisht, ndonjëherë me qëllim të drejtpërdrejtë për të dëmtuar vendin tonë”, tha ai.
“Përkeqësimi i situatës së sigurisë”
Në një deklaratë të veçantë, ministri suedez i Mbrojtjes Civile Karl-Oskar Bohlin tha se aktorët e mbështetur nga Rusia po përforconin deklarata të rreme, të tilla si se shteti suedez qëndron pas përdhosjes së librave të shenjtë.
“Kjo, natyrisht, është krejtësisht e rreme”, theksoi ministri suedez, duke shtuar se fushata synon të krijojë ndarje dhe të dobësojë pozicionin ndërkombëtar të Suedisë.
Shërbimi suedez i sigurisë ka thënë më parë se situata e sigurisë në Suedi është përkeqësuar pas djegieve të fundit të Kuranit dhe protestave në botën myslimane dhe se këto ngjarje kanë ndikuar negativisht në imazhin e kombit nordik.
Imazhi i Suedisë ka ndryshuar “nga një vend tolerant në një vend armiqësor ndaj Islamit dhe muslimanëve, ku shteti sanksionon sulmet ndaj muslimanëve dhe ku shërbimet sociale mund të rrëmbejnë fëmijë myslimanë”, sipas një deklarate nga shërbimi. /tesheshi.com/
