Parlamenti malazez rrëzoi qeverinë e kryeministrit Zdravko Krivokapiç, duke votuar një mocion mosbesimi. Strumbullar në këtë rast, si dhe në formimin e kësaj qeverie, ishte shqiptari Dritan Abazoviç. Ky i fundit, pasi i shpëtoi vetë një shkarkimi nga parlamenti, i mohoi mbështetjen Krivokapiçit si zv.kryeministër dhe partner i koalicionit, në mes të tensioneve të mëdha politike në vend.
Kjo është hera e parë që qeverisë malazeze i jepet një votë mosbesimi në parlament.
Kreu i klubit të përfaqësuesve të Lëvizjes Qytetare URA, Millosh Konatar, tha se qeveria e kryeministrit Zdravko Krivokapiç arriti kufirin dhe se kriza politike në të cilën u gjend Mali i Zi kërkon vendime të vështira.
“Ky vendim është i vështirë dhe ne jemi të gatshëm të marrim përgjegjësi për të”, tha Konatar.
Ai tha se beson se mandatar për përbërjen e qeverisë së re duhet të jetë zëvendëskryeministri aktual Abazoviç.
Ai u bëri thirrje qytetarëve që të jenë të qetë, pasi siç ka deklaruar, në Mal të Zi nuk po ndodh asnjë apokalips.
“Asgjë që nuk po ndodh në vendet normale evropiane nuk po ndodh as këtu. Ne kemi votuar, kemi luftuar që ndryshimi i çdo qeverie të jetë një gjë normale”, shtoi Konatar.
Iniciativën për mosbesimin e qeverisë e inicioi zv/kryeministri Dritan Abazoviç.
Kur nisi nismën, Abazoviç njoftoi se, pas rënies së qeverisë së Krivokapiç, ai do të formonte një qeveri të pakicës me Partinë Boshnjake dhe partitë shqiptare dhe Partinë e moderuar pro-serbe të Popullit Socialist, të mbështetur nga opozita aktuale.
Ai tha se priste mbështetje dhe nga Partia Demokratike e Socialistëve (DPS) të presidentit malazez Milo Gjukanoviç, të cilën e mposhti së bashku me partnerët e tij të koalicionit në zgjedhjet e gushtit 2020. /tesheshi.com/
