Zv.kryeministri i Kosovës nga radhët e serbëve Branimir Stojanoviq, vazhdon të sfidojë shefin e tij Isa Mustafa.
Si një zyrtar i lartë shtetëror i Kosovës, Stojanoviq, ia ka bërë sërish të qartë partive të koalicionit qeverisës PDK-së e LDK-së se Lista Serbe nuk e ka ndërmend të kthehet as në qeveri e as kuvend, pasi thotë se dy ligjet e miratuara së fundmi, ai për “Trepçën”, dhe për investime strategjike nuk janë në interesin e serbëve.
Ai paralajmëron se Lista Serbe nuk do të rrijë duarkryq dhe se për çështjet e lartcekura do t’i informoj institucionet në Bashkimin Evropian dhe qeveritë perëndimore me qëndrimet e tyre si subjekt politik.
Stojanoviq, në një intervistë për seksionin në gjuhën serbe të Radios Evropa e Lirë, e bën të qartë se Lista Serbe nuk e ka ndërmend të kthehet Kuvend edhe nëse eventualisht do të shtrohet çështja e votimit të Demarkacionit.
“Është më se e qartë se ka pak gjasa që të votohet në Kuvend kjo marrëveshje”, thotë Stojanoviq, duke rikujtuar se për Demarkacionin nuk ka pajtim as te partitë shqiptare.
Stojanoviq ka shpreh shqetësimin e tij edhe në lidhje me vonesat në procesin e themelimit të Asociacionit të komunave me shumicë serbe.
“Në rrethanat aktuale politike mendoj se nuk është reale të pritet që kjo do të ndodhë shpejt. Ka shumë deklarata se Asociacioni do të themelohet, por vendim nuk ka dhe kjo për ne është shqetësuese”, thekson Stojanoviq.
Ai ka folur edhe për (mos) themelimin e ushtrisë me ç’rast ka thënë se në rrethanat e krijuara politike, Lista Serbe, nuk dëshiron të diskutoj fare me qeverinë e Kosovës për transformimin e Frocës së Sigurisë së Kosovës (FSK) në Forcat e Armatosura të Kosovës (FAK).
Siç dihet, themelimi i këtyre forcave është i varur nga vota e deputetëve serb, pasi që Kushtetuta e Kosovës e njeh votimin e dyfishtë i cili kërkon mbështetjen e dy të tretave të komuniteteve pakicë në Kuvend. /tesheshi.com/
