Paulin Sterkaj, deputeti i PS-së në qarkun e Shkodrës, ka rikthyer edhe njëherë në vëmendje debatin për kullën e Prek Calit. Në mbledhjen e grupit parlamentar socialist, Sterkaj ka drejtuar gishtin ndaj Tom Doshit, deputetit të PSD-së.
“Këto dy javët e fundit ka pasur një problem në media për një situatë në Malësinë e Madhe. Kjo s’ka lidhje me prishjen e shtëpisë së Prek Calit. Në shtëpinë e tij, disa individë të veshur me pushtet parlamentar, kanë vendosur ti rikonstruktonin shtëpinë. E kanë prishur dhe shkatërruar ata. Nipi i Prek Calit, i ka kërkuar ndihmë bashkisë që të ndërhyjë se po i prishin shtëpinë.
Deputeti që ka dalë se do e bëjë tre katëshe shtëpinë e ka 15 breza larg, siç e ka ai e kam dhe unë.
Janë nja 40 dynym tokë të Prek Calit, duke thënë se e kanë gjysh, i marrin tokën për ta përdorur për bizneset e veta. Çdo thashethem atje, nuk lidhet me figurën e Prek Calit. Nipi i vetëm që ka lënë Prek Cali ka thënë ‘po na përdhunojnë shtëpinë e dajës”, tha Sterkaj.
Ndërkohë shqetësimi i dytë deputetit socialist ishin gjobat që merrnin ligjvënësit për shkak të parkimit të makinave gjatë seancave parlamentare. “Na siguroni kushtet, s´kemi ku lemë makinat. Policia po na gjobit”, tha Sterkaj.
Por përballë këtij shqetësimi, Rama e ftoi deputetin që çdo të enjte të niseshin bashkë në këmbë nga kryeministria dhe të shkonin në Kuvend.
“Si sportista që kemi qenë na bën mirë të ecim në këmbë, të enjten të pres në kryeministri dhe ikim të dy në këmbë”, tha Rama, batuta e të cilir shkaktoi të qeshura mes deputetëve socialistë. /tesheshi.com/
