Çerekfinalet e para të Champions League-s ua lënë vendin sonte atyre të Ligës së Europës. Ku, pa dyshim, kryendeshja është Borusia e Dortmundit – Liverpul.
Jo vetëm për faktin se përballen dy ekipe me histori të madhe në arenën europiane, por, më tepër, se Jurgen Klopp, arkitekti i rilindjes së Borusias, do të vërë sonte këmbën në stadiumin “Signal Iduna Park” si kundërshtar i vendasve.
Aq i fortë është përqendrimi i vëmendjes në të, sa në takimin e sotëm do të ketë një kamera që do të filmojë vetëm trajnerin e Liverpulit, për të mos lënë asnjë fjalë apo lëvizje të mimikës së tij të ikë pa u vënë re.
Thomas Tuchel, trajneri aktual i Borusias, e çmon shumë figurën e Klopp-it, por premton se do të kërkojë veç fitoren.
“Ne jemi këtu ku jemi për shkak të historisë sonë me Jurgen-in. Liverpuli ka vijuar të përmirësohet në javët e fundit. Ata kanë cilësi të jashtëzakonshme individuale në skuadër, e është tejet e vështirë të luash kundër tyre. Nga momenti që bie bilbili, Jurgen Klopp nuk do të dëshirojë asgjë tjetër, veçse të fitojë. Dhe ne gjithashtu!”
Kjo është hera e katërt që dy ekipet takohen në një ballafaqim europian. Nga një fitore kanë dy ekipet, pos një barazimi. Ndërkaq, Borusia nuk ia ka dalë të shënojë në dy takimet e fundit ndaj Liverpulit, me një 0-0 në shtëpi në fazën në grupe në Champions League në sezonin 2001-2002, ndërsa ka humbur 2-0 në takimin e dytë në Angli.
Ndeshja nis në 21:05, ashtu si tre takimet e tjera, dhe do të gjykohet nga spanjolli Carlos Velasco.
Në tre çerekfinalet e tjera do të kemi këto duele:
Sporting Braga – Shakhtar i Donjeckut
Vilareal – Sparta e Pragës
Atletik Bilbao – Sevilja
/tesheshi.com/
